اسلام آباد۔ 08 نومبر(اے پی پی) نگران وزیراعظم انوارالحق کاکڑ اوغانستان ءِ تین پہ تینی کمکاری نا پوسکن ءُ تاریخ اس نوشتہ کننگ نا سلہ خلسا پارینے کہ اوغانستان و پاکستان اِرا ہمسایہ ولے وتواجہ ملک ءُ ہرافتا تین پہ تینی تعلقداری تے رسمی وڑاٹ استوار کننگ نا گرج ءِ، پاکستان نا الس اوغان باہوٹ آتیکن دیدہ دل فرش راہ کرے، دابے مٹ جوزہ ایثار نا ورندی ٹی دوبہ خلنگ و دشنام طرازی پاکستان نا غیرتی و بے لوث الس نا جوزہ غاتے ہسون کرے، بدبختی اٹ پاکستان نا صبر، فراخ دلی و مصالحت پسندی نا قدر ءِ کننگتو و اوغان عبوری حکومت اوغانستان آن مروک آ پاکستان مخالف دہشت گردی نا برخلاف خاطرخواہ گام گیج کتو، اوغان حکومت نا کمک کپننگ آن پد داسہ پاکستان تینا داخلی باندات آتے تینا کمک تینٹ نا رداٹ سہی کننگ نا فیصلہ کرینے، اوغان عبوری حکومت اوغانستان اٹی غیرکانودی وڑاٹ رہینگوک پاکستانی، ہراپاکستان اٹ دہشت گردی ٹی اوار ءُ ، ءِ پاکستان نا دوٹی ایتے و تحریک طالبان پاکستان نا سرکوبی کن ہرممکن گام گیج کے و اوغانستان اٹی ساڑی تحریک طالبان پاکستان نا ٹھکانہ و ہیلکاری ہند آ تے چٹفے۔ چارشنبے نادے آ داڑے پریس کانفرنس آن تران کرسا وزیراعظم پارے کہ پاکستان و اوغانستان نا نیام اٹ ہمسائیگی، مذہب، اخوت و ایلمی نا بھلو رشتہ اسے۔ تدوک آ چار دہائی ٹی اوغانستان کن ہرا ایثار و اخوت نا درشانی ءِ ریاست پاکستان و پاکستان نا الس کرینے او اونا عملی وڑ ءِ۔ ہراتم ہم اوغانستان آ آفت اس بس ، پاکستان نا حکومت و الس اوفتا پبی کمک ءِ کریر و ہروڑاٹ اوفتا درد آتے بشخار۔ پاکستان تدوک آ 44 سال آن 40 لکھ آن زیات اوغان شاری تے است اناحب اٹ بخیر اٹ پارے و کچ اٹنگاوسیلہ غاتیان پد ہم بے کچ خندہ پیشانی اٹ تینا اوغان ایلم تتون پبی تفے۔ دارداٹ جہانی ادارہ نا کچ اٹ و گونڈ امداد پاکستان نا مہاجرآتے چار دہائی تیا تالان کمکاری نا عشر عشیر ہم اف۔ وزیراعظم پارے کہ اگست 2021اٹی اوغانستان اٹی عبوری حکومت نا جوڑ مننگ آن پد ننے دا پکا اومیت ئس کہ اوغانستان اٹی دیرپا امن مریک۔ تین پہ تینی کمکاری اٹ ہڑتوم آ ریاست آک شونداری و شونہالی نا پوسکن ءُ کسر استوار کیرہ۔ پاکستان مخالف گروہ خاص وڑاٹ تحریک طالبان پاکستان نا برخلاف سخت کارروائی کننگک و اوفتے اوغانستان نا گل زمین ءِ پاکستان نا برخلاف کاریم اٹ اتنگ نا موکل اسُل تفننگک ولے بدبختی اٹ عبوری اوغان حکومت نا جوڑ مننگ آن پد آن پاکستان اٹ دہشت گردی نا واقعہ غاتیٹی 60 درسد و خودکش جلہو آتیٹی 500 درسد ودکی مس۔ تدوک آ 2 سال اٹی 2267کودک پاکستانی شاری تا جونک دا است ہسون خونریزی نا گواچی مسر ہرانا زموار تحریک طالبان پاکستان نا دہشت گرد آک ءُ ہرا اوغانستان نا گل زمین ءِ کاریم اٹ اتسا پاکستان آ بزدلانہ جلہو کننگ ءُ۔ داوخت اٹی خودکش جلہو آتیٹی اوار بندغ آتیٹی 15 اوغان شاری ہم اوار ئسر۔ داکان بیدس داتم اسکان 64 اوغان شاری انسداد دہشت گردی نا مہم اٹی پاکستان نا کانود نافذ کروک آ ادارہ غاتون جنگ ترسا زوال کریر۔ داغٹ راستکی تا اوغان کمامدارآتے سماءِ۔ وزیراعظم پارے کہ فروری 2023 آن پدریسہ اتون ہر 15 دے آن پد پاکستان نا کنڈآن اوغان عبوری حکومت ءِ برانزی مراسلہ غاتیٹی اوغانستان تون منسلک دہشت گرد جلہو آتا پورو سرجم آتے مہیا کننگ انگ ءِ۔ اقوام متحدہ نا مانیٹرنگ ٹیم انا جولائی 2023اٹی جاری مروک آ رپورٹ اٹی ہم اوغانستان اٹی ساڑی تحریک طالبان پاکستان نا مرکز و اوفتا پاکستان مخالف سرجزآتیٹی ودکی نا پیدوار ذکر ءِ کننگانے۔ داغٹ آن پد ہم پاکستان مچ آ دنیا ٹی اوغانستان و اغان الس نا پبی مخ تفی و وکالت ءِ برجاتخا و نن اوغانستان نا حالیت و اوغان الس ءِ مون تروک مشکل آتا کنڈآ جہانی برادری نا چکار ءِ کرفسا کرین۔وزیراعظم پارے کہ داڑتون اوار اوار حکومت پاکستان اوغانستان ءِ واپار و درآمد نا بابت بے کچ بھلو آسودہی تس ولے بدبختی اٹ پاکستان نا صبر، است بھلنی و مصالحت پسندی نا قدر ءِ کننگتو و اوغان عبوری حکومت اوغانستان آن بش مروک آ پاکستان مخالف دہشت گردی نا برخلاف ہچ ءُ خاطرخواہ گام گیج اس کتو۔ آخرکار فروری 2023اٹی اسہ دہشت گرد جلہواسے ٹی 100 آن زیات کودک بندغ آتا شہیدی آن پد وزیردفاع نا کماشی ٹی اسہ بڑزکو کہول ڈل اس اوغانستان نا دورہ ءِ کرے، ہراٹی ڈی جی آئی ایس آئی ہم اوار ئسک۔ دا ڈل اوغان عبوری حکومت ءِ پاکستان نا گڑتی تیان معلومدار کرسا پاکستان یا تحریک طالبان پاکستان آن اسٹ اسے گچین کننگ نا دوٹوک عندیہ تس۔ اوکان پد ہم سیاسی، سفارتی ، فوجی، رسمی وغیررسمی ذریعہ اٹ اوغان عبوری حکومت ءِ اوغانستان آن مروک آ دہشت گردی ءِ چٹفنگ نا پیدوار کلہو ترسا کننگا۔ اوغانستان اٹی ساڑی پاکستان ءِ درکار سرکڑدہ دہشت گرد آتا فہرست ءِ ہم اوغان عبوری حکومت نا دُوٹی تننگا، اوغان عبوری حکومت نا وار وار آ باوری کرفنگ آن پد ہم پاکستان مخالف دہشت گرد ٹولی تا برخلاف ہچ ءُ گام گیج اس کننگتو بلکن منہ وارخواہی تیا تو دہشت گرد آتا کمکاری نا پیدوار شاہدی ہم مون آ بس۔ دا پژدر اٹی پبی ءُ گام اس ہرفنگ نا جاگہ غا اوغان حکومت کیہی وار دا مشورہ تس کہ پاکستان تینا اندرونی حالیت آتیا چکار کے۔ وزیراعظم پیدوار کرے کہ اوغان حکومت نا دا رویہ و کمک کپننگ آن پد داسہ پاکستان تینا داخلی باندات آتے تینا کمک تینٹ سہی کننگ نا فیصلہ کرینے۔ دابابت پاکستان نا ساڑی آ گام گیج نئے تو غیرگمانی و نئے حیران کن ءِ۔ پاکستان اٹ بدامنی تالان کننگ اٹ اسہ بھلو کڑد اس غیرکانودی پردیسی تا ءِ۔ ہنداسوب آن ریاست پاکستان دا بندغ آتے یکم نومبر آن پدی تینا ملک آتیا گدریفنگ نا فیصلہ کرے۔ پاکستان اٹ اسہ بھلو کچ اسے ٹی درملکی غیرکانودی وڑاٹ رہینگ انگ ءُ ہرافتے ٹی گیشتری اوغان شاری تا ءِ۔ دہشت گردی و مجرمانہ سرجزآتیٹی اوار گیشتر بندغ آتا تعلق ہندا غیرکانودی پردیسی تیان ءِ۔
