اسلام آباد۔ 08 نومبر (اے پی پی) آذربائیجان نا سفیر خضر فرہادوف پارینے کہ آذربائیجان نا الس پاکستانی بیرک ءِ آذربائیجان و ترکی نا بیرک آتون پاکستانی ایلم و ایڑھ تاشرف و تشکر نا نشانی نا وڑاٹ چست کرینو۔ داخیال آتا درشانی ءِ او داڑے آذربائیجان نا وکٹری ڈے انا وخت آ اڈہلوک دود آن تران کرسا کرے۔ نگران بنجائی وزیر حوالکاری و شینکاری مرتضیٰ سولنگی دود اٹی مہمان خاص نا حیثیت اٹ بشخ ہلک۔ دود اٹی چندی ملک آتا سفیر، زند انا چندی بشخ آتیان تعلق تخوک آ اہم شخصیت و صحافیک بھلو کچ اسے ٹی بشخ ہلکر۔ سفیر دا وخت آ تران کرسا پارے کہ جمہوریہ آذربائیجان اٹی ہرسال 8 نومبر ءِ یوم فتح نا وڑاٹ اڈتننگک، 3 سال مست آذربائیجان تینا علاقہ غاتے آرمینیائی کوزہ غان آجو کرفے و تینا علاقائی سالمیت ءِ بحال کرے۔ خضر فرہادوف پارے کہ نن تینا شہید آتے است انا حب اٹ خراج عقیدت پیش کینہ ہرافک ملک انا آجوئی، وتواجہی و علاقائی سالمیت کن تینا جون تے ندر کریر، آرمینیا کم و ود 30 سال اسکان آذربائیجان نا 20 درسد علاقہ غاتے تینا کوزہ ٹی تخا، آرمینیا آذربائیجان نا مقبوضہ علاقہ غاتیٹی جنگی ڈوہ انا ارتکاب کرے ، آرمینیا 1992ٹی ہرا جالی نسل کشی نا ارتکاب کرے ہراٹی بے گناہ شاری تے خلنگا۔ اومقبوضہ علاقہ غاتیٹی آذربائیجان نا آبادی نا نسل کشی ءِ کرے و غٹ آذربائیجانی تے مقبوضہ علاقہ غاتیان زوراکی اٹ بے دخل کننگا۔ آذربائیجان نا سفیر پار ے کہ آرمینیائی کوہ و حب الوطنی نا 44 دے انا جنگ اٹی ایلم ملک پاکستان مدام آذربائیجان نا اخلاقی و سفارتی مخ تفی ءِ کرے، ای اسہ وار ولدا پاکستان نا حکومت و الس نا اوفتا پدریسہ مخ تفی آ منت واری ءِ ہرفنگ خواوہ۔ اوپارے کہ 1993ٹی اقوام متحدہ نا سلامتی کونسل 4 قرارداد منظور کرے ہرافتے ٹی آذربائیجان نا گل زمین آن آرمینیائی فوجی تا دمدستی و بے شڑت آن کشنگ نا خواست ءِ کننگا، اسلامی کمکار تنظیم و ایلو جہانی تنظیمک ہم ہنداوڑنا قرارداد منظور کریر ولے آرمینیا اقوام متحدہ نا سلامتی کونسل و ایلو جہانی تنظیم تا قرارداد آتیا عملدرآمد کتو۔
