کوئٹہ۔ 08 نومبر (اے پی پی) چیئرمین اسٹینڈنگ کمیٹی پیٹرولیم ریسورسز و سیاسی اقتصادی امور نا ماہر سینیٹر محمد عبدالقادر اسہ خصوصی ءُ بیان اسے ٹی پارینے کہ فلسطین آ ایٹم بمب جلہونا اسرائیلی دھڑکو علاقائی سلامتی کن بھلو خطر ہ اسے، اسرائیلی وزیر دودوربیدہ، قومی میرات ویروشلم افیئرز ایمیچل ایلی یاہو پارینے کہ اگہ ضرورت تما تو اسرائیل فلسطین آ ایٹمی جلہو کرسا فلسطینی تے بھس کیک تخک۔ اسرائیلی وزیرنا انسانیت سوز دھڑکو اسرائیلی یہودی تا سفاکانہ ذہنیت نا غمازی ءِ کیک ۔ اوپارے کہ جہانی برادری اگہ اسرائیل نا بربریت نا دمدستی وڑاٹ دُو ءِ توتہو تو اونا سفاکیت گنوکی نا حد آتیان گدرینگک، اسرائیل ہرا بے حسی اٹ فلسطینی تیا جلہو کننگ ءِ اونا پد اٹ امریکہ و اونا حواری ملک آک ءُ، اسرائیلی وزیر نا دھڑکو نسل کشی و فلسطینی تا چٹفنگ نا ارادہ نا درشانی ءِ۔ جہانی برادری دابیان ءِ سنجیدگی اٹ ہلے ۔ اوپارے کہ جہانی برادری اسرائیلی وزیر نا ایٹمی جلہو نا دھڑکو نا سنجیدگی اٹ نوٹس ءِ ہلے و دمدستی وڑاٹ اودے جنگ بندی آ بیوس کے۔ اسرائیلی جارحیت ڈیہہ انا امن، سلامتی و سوگوی ءِ خطرہ غاتا گواچی کرینے، چیئرمین قائمہ کمیٹی مستی پارے کہ ہندن لگک کہ امریکہ، برطانیہ، فرانس، جرمنی اسرائیل ءِ فلسطینی تا کشت وخون نا لیسن جاری کرینے، یواین سیکورٹی کونسل و اوآئی سی ءِ جنگی بندی نا بابت دمدستی و حتمی کننگے تانکہ ڈیہہ انا دیرپا امن ءِ پٹنگ مرے۔ ہراتم اسکان دوقومی نظریہ نا رداٹ فلسطین و اسرائیل نا باندات آتے ایسر کننگپک مچ آ ڈیہہ جہنم مرساکیک، جہانی برادری ءِ غزہ نا محصورین آتے ہموغٹ انسانی حق آتے تروئی مریک ہرااسرائیلی تے دوئی ءِ۔
