کوئٹہ۔ 08 نومبر (اے پی پی)بلوچستان عوامی پارٹی نا سینئر راہشون و چیئرمین آئین ساز کمیٹی (بلوچستان عوامی پارٹی) شاہ زمان خان غلزئی پارینے کہ بلوچستان عوامی پارٹی تینا آئین و منشور ءِ مون آ تخسا ملوک آ سرسہبی تے تالان کرسا ہر گمر محسوس کیک۔ داخیال آتا درشانی ءِ او پارٹی ورکرآتیان اسلام آباد اٹی اسہ میٹنگ اسے ٹی تران کرسا پارے۔ داوخت آ اوپارےے کہ ننا پارٹی بلوچستان نا شونداری و آسودہی کن بھازانگا اہم گام گیج کرینے۔ ننے گمر ءِ کہ ننا داکوشست آک بلوچستان ءِ تعلیم نا روشنی ٹی بڑزکو ہند اس تسنو۔ نن تعلیم نا بشخ آتیٹی ودکی کریسن تانکہ ہر اسہ بلوچستان ورناتینا کسبی تربیت دوئی کننگ کیر۔ وتینا روزگار نا ذریعہ دوئی کننگ کیر۔ ننا مسکوہی حکومت جان جوڑی نا مون آ دسننگ کن ہم اہم گام اس ہرفینے۔ جان جوڑی نا آسراتی تا بنداو ءِ تخنگانے تانکہ ہراسہ شاری جوان جان جوڑی نا دیکھ بھال دوئی کننگ کے۔ بلوچستان عوامی پارٹی نا السی حکومت بےر وزگاری نا ویل انا ایسر اس پٹانے و بلوچستان نا ورنا چین ءِ روزگار نا فراوانی کن گام گیج کرینے۔ نن اہم پروجیکٹ آتا کمک اٹ چندی بشخ آتیٹی وارخواہی فراوان کننگ اُن تانکہ بلوچستان نا ورناک تینا لائخی تیان فائدہ ہرفنگ کیر۔ و نئے بیرہ ملکی بلکن جہانی کہول آ تینے منفنگ کیر۔ ننا حکومت انصاف نا خواست آتے پورو کرسا الس ءِ اڑزان انصاف نا فراوانی کن ہموگام گیج آتے کرے ہرافتے داکان مست انا حکومت آک کننگ کتنو و صوبہ غان دہشت گردی نا چٹفنگ نا کنڈآ ہم قابل تحسین گام گیج کرینے۔ ننا حکومت سیکورٹی و پولیس فورس آتے سوگو کرینے تانکہ بلوچستان اٹ امن و ایمنی نا چاگڑد ساڑی سلے۔ داوخت آ او مستی پارے کہ بروک آ گچین کاری تیٹی ہم بلوچستان عوامی پارٹی تینا منشور نا رداٹ بلوچستان نا شونداری کن و الس نا خذٰت کن گام گیج کیک۔ ننا قول ءِ کہ نن گچین کاری تیان پد ہم الس نا خذمت ءِ کرسا کینہ و بلوچستان ءِ اسہ گچین ءُ آخبت اسے نا کنڈآ دینہ۔ بلوچستان عوامی پارٹی نا مسخت مدام بلوچستان نا شونداری و الس نا خذمت نا خواست آتے پورو کننگ ءِ۔ نن الس آن خواست کینہ کہ ننتون اواری اٹ بلوچستان ءِ اسہ گچین ءُ کنڈاسے آ دین۔ و صوبہ غان دہشت گردی نا چٹفنگ، تعلیم نا مون آ دننگ ، جان جوڑی نا دوئی کننگ، تعلیم و اڑزآن انصاف دوئی کننگ کن گچین و ٹیکنکل تعلیم کن بلوچستان عوامی پارٹی ءِ وونٹ ترسا تینا ضمیر ءِ است جم کین۔ اوایسر اٹ نوابزادہ میر خالد خان مگسی ءِ بلوچستان عوامی پارٹی نا مرکزی صدر گچین مننگ آ است انا حب اٹ مبارکبادی ترسا پارینے کہ مرکزی صدر بلوچستان عوامی پارٹی بلوچستان اٹی مروک آ بے چینی تے و قبائلی رنجش آتے چٹفنگ اٹ اہم ءُ کڑد اس ادا کیک۔
