بلوچستان نا ورناتیٹی ٹیلنٹ نا ہچ ءُ کمتی اس اف  اگہ گوازی گرآتے جوان وارخواہی فراوان کننگے تو دا ورناک نئے بیرہ ملک اٹی بلکن پیشن نا ملک ہم پاکستان نا پن ءِ روشنا کننگ کیرہ، مسکوہی سیکرٹری اسپورٹس بلوچستان اسحاق جمالی

کوئٹہ۔ 08 نومبر (اے پی پی)مسکوہی سیکرٹری اسپورٹس بلوچستان اسحاق جمالی و کوئٹہ ڈسٹرکٹ اینڈ ریجن کرکٹ ایسوسی ایشن نا چیئرمین محمدخیرئسک پارینو کہ بلوچستان نا ورناتیٹی ٹیلنٹ نا ہچ ءُ کمتی اس اف  اگہ گوازی گرآتے جوان وارخواہی فراوان کننگے تو دا ورناک نئے بیرہ ملک اٹی بلکن پیشن نا ملک ہم پاکستان نا پن ءِ روشنا کننگ کیرہ، صوبہ ٹی کرکٹ اکیڈمی تا مون آ دننگ اٹ اہم کڑد اسے، کوئٹہ ڈویلپمنٹ پیکج نا رداٹ تفنگوک آ الریحان منی اسپورٹس کمپلیکس اٹ بے آب اٹ تعمیراتی کاریم نا بایدے جاست وپاست مرے۔ داہیت ءِ اوفک چارشنبے نادے آ کوئٹہ نا علاقہ ایئرپورٹ روڈ آ الریحان منی سپورٹس کمپلیکس اٹی کرکٹ اکیڈمی نا بنانا وخت آ صحافی تتون گپ وتران و گوازی گرآتیان تران کرسا پاریر۔ داوخت آ شہباز خان، محمد عرفان و محمد سمیع ئسک ہم ساڑی ئسر۔ محمد خیر مسکوہی سیکرٹری اسپورٹس ءِ حوال ترساپارے کہ دا اسپورٹس کمپلیکس کوئٹہ ڈویلپمنٹ پیکج نا رداٹ مسکوہی وزیراعلیٰ بلوچستان جام کمال خان نا دور اٹی جوڑ مس ہراٹی چندی گوازی تا مقابلہ مریک۔ مسکوہی سیکرٹری اسپورٹس اسحاق جمالی پارے کہ کنے دا اسپورٹس کمپلیکس ءِ خنسا خوشی مس ولے ڈکھیائی ہم مس ہراوڑاٹ داڑے کاریم نا گرج ئس ہمووڑاٹ متو و اسپورٹس کمپلیکس نا تفنگ تون اوار دیرو بجلی نا ویل آتیا بایدے چکار کننگوسس، کوئٹہ ٹی دا تینا وڑنا اسہ بھلو اسپورٹس کمپلیکس اسے ہراڑے گوازی گرآتا گرج انا رداٹ اوفتے جیم اتون اوار کرکٹ اکیڈمی و فٹسال تون اوار ایلو گوازی تا وارخواہی ملک۔ اوفک پاریر کہ گراؤنڈ اٹی ٹیوب ویل کن بجلی نا کنکشن نا فراوانی نا بابت او سیکرٹری اسپورٹس تون رابطہ کیک تانکہ کمپلیکس اٹی دیراناکمتی ءِ پورو کننگ مرے۔ اوپارے کہ بلوچستان نا ورناتیٹی ٹیلنٹ نا ہچ ءُ کمتی اس اف اگہ گوازی گر آتے گوازی نا جوان وارخواہی فراوان کننگے او نئے بیرہ پاکستان بلکن پیشن نا ملک ہم پاکستان نا پن ءِ روشنا کننگ کیرہ۔