اوآئی سی و سعودی عرب نا کنڈآن ’’اسلام اٹی زالبول : حیثیت و اوفتےواکدار کننگ ‘‘ نا سرحال آ جہانی کانفرنس, وزیراعظم نا خصوصی کمکار مشعال حسین ملک پاکستانی ڈل انا کماشی ءِ کرے

جدہ۔ 07 نومبر (اے پی پی) اسلامی کمکار تنظیم (اوآئی سی ) و سعودی عرب نا کنڈآن ’’اسلام اٹی زالبول: حیثیت و اوفتے واکدار کننگ ‘‘ نا سرحال آ جہانی کانفرنس جدہ ٹی بناکرے۔ کانفرنس اٹی انسانی حق و زالبول آتے واکدار کننگ نا بارواٹی وزیراعظم نا خصوصی کمکار مشعال حسین ملک پاکستانی ڈل انا کماشی ءِ کننگ ءِ، کانفرنس اٹی اوڑتون اوار چیئرپرسن نیشنل کمیشن آن دی سٹیٹس آف ویمن نیلوفر بختیار و اوآئی سی ٹی پاکستان نا آخبتی نمائندہ فواد شیرئسک ہم شریک ءُ۔ کانفرنس اٹی مسکوہی وزیرخارجہ حناربانی کھر ہم بطور کانفرنس پینلسٹ بشخ ہلنگ اٹی ءِ۔ کانفرنس 8 نومبر اسکان برجاسلک ہرانا مسخت اسلامی راج اٹ زالبول آتا کڑدآ گیشتر بنداو شرہ کننگ ءِ۔ کانفرنس اٹی اسلام اٹی زالبول آتا حق و زمواری تیا چکار کننگک۔ کانفرنس اٹی اسلامی اسکالر و او آئی سی نا باسک ملک آتا سرکاری ڈل آتیان بیدس زالبول سروک مملکت، وزیر و چندی جہانی و علاقائی تنظیم تا نمائندہ غاتا بھلو کچ اس بشخ ہلنگ اٹی ءُ، مچ آ دنیا غان پولکار، تھنک ٹینکس و پٹ وپولی مرکزنا نمائندہ غاک ہم کانفرنس اٹی شریک ءُ۔ کانفرنس اٹی 5 سرحال آتیا سجفنگک ہرافتے ٹی اسلام اٹی زالبول آتا حیثیت و اوفتا حق، مسلم زالبول و اسلامی رغاموک و راجی روایت، خلیجی، عربی و اسلامی رداٹ مسلم زالبول، ساڑی راج اٹی مسلم زالبول و تعلیم و کاریم اٹی مسلم زالبول آتا واکدار مننگ ناگمان اوار ءِ۔