اسلام آباد۔ 07 نومبر (اے پی پی) چیئرمین سینیٹ صادق سنجرانی موٹروے ایم ون سیکشن آن اسلام آباد انٹرنیشنل بالی پٹ اسکان کسر نا مفننگ نا بابت رپورٹ بٹنگا وخت اس کہ نگران بنجائی وزیر حوالکاری و شینکاری مرتضیٰ سولنگی پارے کہ ممکن مس تو نگران حکومت نا مد اٹی ہی داڑآ کاریم نا بناءِ کرفنگک۔ سے شنبے نادے آ سینیٹ نا دیوان اٹی سینیٹر محسن عزیز پنجاب و خیبرپختونخواغان بروک آمسافر آتیکن موٹروے ایم ون سیکشن آن اسلام آباد انٹرنیشنل بالی پٹ انا کنڈآ کسر نا مفننگ آن مخلوق ءِ مون تروک ویل آتا بابت چکاری نوٹس اس پیش کرے ہراڑآ نگران بنجائی وزیر حوالکاری و شینکاری مرتضیٰ سولنگی پارے کہ سینیٹر محسن ہراباندات ءِ ہرفینے و ہرا سلاہ ءِ او پیش کرینے او بھاز جوان ءِ۔ خیبرپختونخوا آن بروک آ مخلوق نا تکلیف نا بایدے مداوامرے، داباندات ءِ اینو تعلقدار وزارت نا نوٹس اٹ اتنگک و اگہ ممکن مس تو ساڑی نگران حکومت نا مد اٹی دا ڈٹ انا بناءِ کننگک۔ چیئرمین سینیٹ صادق سنجرانی پارت کرے کہ نیشنل ہائی وے اتھارٹی و ڈٹ بندی ڈویژن دا بابت ڈٹ اس تیار کیر و حکومت اوڑکن فنڈ فراوان کے۔
