اسلام آباد۔ 07 نومبر (اے پی پی) چیئرمین سینیٹ محمد صادق سنجرانی موشن پکچرز (ترمیمی) بل 2023 ء آ سجفنگ ءِ موخر کرے وخت اس کہ نگران بنجائی وزیر حوالکاری و شینکاری و پارلیمانی امور مرتضیٰ سولنگی پارے کہ آئین، کانود و جمہوریت نا اصول آتون سلوک اُٹ، بل آ سینیٹ انت کہ فیصلہ اس کیک اونا شرف ءِ کینہ۔ سے شنبے نادے آ سینیٹ نا دیوان اٹی موشن پکچرز ترمیمی بل 2023ء ہم ایجنڈاٹی اوار ئس۔ سینیٹر رضاربانی نگران حکومت نا کنڈآن بل پیش کننگ آ اعتراض کرے۔ ہراڑا بنجائی وزیر حوالکاری وپارلیمانی امور مرتضیٰ سولنگی سینیٹ اٹی گپ و تران کرسا پارے کہ دا ہیت ءِ وضاحت اٹ پاننگ خواوہ کنا 63 سال وئی ءِ و مچ آ وئی آئین و کانود تون سلیوہ وداٹی ہچ ءُ پرخ اس بفک، سینیٹ انت کہ فیصلہ اس کیک اونا شرف ننا غٹ آ لازم ءِ۔ اوپارے کہ بل انا تیاری آ اخس وخت لگک سینیٹ نا باسک آتے دانا جوانی اٹ علم ءِ، دا بل ننے آ بننگ آن مست مسکوہی حکومت نا دور اٹی زیرغور ئس۔ اوپارے کہ وزارت کانود ولیگل برانچ کنے ہندا مشورہ تسر کہ نی موشن پکچرز( ترمیمی) بل 2023 ء ایوان اٹ پیش کر ہنداسوب آن ای حاضر مسونٹ ولے داڑا چیئرمین و سینیٹ انت کہ فیصلہ اس کیک ای اونا شرف ءِ کیوہ۔ چیئرمین پارے کہ اگہ داٹی دمدستی نوعیت نا باندات اس اف تو اودے گچین مروک آحکومت نا بننگ اسکان التواٹی تخنگے۔ مرتضیٰ سولنگی پارے کہ دا بل ءِ ایہن ہم کمیٹی آ ہنوئی ئسک و چونکہ قومی اسمبلی ساڑی اف، دمدستی وڑاٹ کانود تو جوڑ مننگ کپک ہنداسوب آن انت کہ فیصلہ اس نی کیسہ اونا شرف ءِ کننگک۔ اوکان پد چیئرمین دا باندات آ غور ءِ موخر کرے و پارے کہ داڑآ اٹارنی جنرل تون ہم سلابت کننگک و جمعہ آ داڑآ فیصلہ کننگک۔
