اسلام آباد۔ 06 نومبر (اے پی پی) نگران بنجائی وزیر حوالکاری و شینکاری مرتضیٰ سولنگی سی پیک ڈٹ آتا پوروی نا بابت حکومت نا عزم انا درشانی ءِ کرسا پارینے کہ سی پیک ڈٹ آتیا کسبی وڑاٹ کاریم برجاءِ، آل پاکستان چائنیز انٹرپرائزز ایسوسی ایشن نا 201 آن زیات باسک کمپنیک داتم اسکان پاکستان اٹ 25 ارب ڈالر نا زرکاری کریر و 85 ہزار آن زیات پاکستانی تے روزگار تسر، وزارت حوالکاری چائنیز انٹرپرائززءِ ہرممکن کمک فراوان کیک۔ داخیال آتا درشانی ءِ او دوشنبے نادے آ داڑے آل پاکستان چائنیز انٹرپرائزز ایسوسی ایشن نا کنڈآن ’’سی پیک نا 10 سال ‘‘ نا سرحال آن رپورٹ اس جاری کننگ نا دود آن تران کرسا کرے۔ نگراں بنجائی وزیر حوالکاری پاکستان چائنا انسٹیٹیوٹ نا کوشست آتا ستاءِ کرسا پارے کہ دا دود دنیا نا مون آ چائنیز انٹر پرائزز نا کنڈآن پاکستان اٹی کروک آ اہم و شاندار کاریم ءِ تالان کیک۔ اوپارے کہ پاکستان چائنا انسٹیٹیوٹ چائنیز انٹرپرائزز نا کوشست آتے مون آ دننگ و الس ءِ آگاہی فراوان کننگ اٹ اہم کڑد ادا کننگ ءِ۔ اوپارے کہ اسہ دے اس ہم ہندن ءُ گدرینگ تنے ہراتم نن میڈیا غا سی پیک ڈٹ آتیٹی چائنیز انٹرپرائزز نا کنڈآن مروک آپیش رفت نا بارواٹی بنپرون۔ چائنیز انٹرپرائزز ہرا کسبی مہارت و مستقل مزاجی اٹ جہانی دین آن پد ہم سی پیک آ کاریم ءِ برجاتخا ہراتم دنیا نا کم و ود ہر ڈٹ اٹی اڑاند آک ئسر، پاکستان و چین نا حکومت آتون اوار اوار جہانی میڈیا ہم دا کوشست آتا ستاءِ کرے۔ اوپارے کہ آل پاکستان چائنیز انٹرپرائزز ایسوسی ایشن نا 201 آن زیات باسک کمپنیک داتم اسکان پاکستان اٹ 25 بلین ڈالر نا زرکاری کرینو و 85 ہزار آن زیات ہندی بندغ آتے روزگار تسر ہرا سی پیک نا بیلٹ اینڈ روڈ انیشی ایٹیو نا گیم چینجر ڈٹ انا تصور نا پیدوار شاہدی ءِ۔ اوپارے کہ آل پاکستان چائنیز انٹرپرائزز ایسوسی ایشن نا رپورٹ اٹی پائیدار شونداری نا حکمت عملی اس جوڑ کننگانے ہرابیرہ موٹروے و پاور پلانٹ آتسکان محدود اف بلکن مستین اٹ تھر و گوادر کون آ گوجالوک آ علاقہ غاتیٹی ہندی کمیونٹی تے واکدار کننگ اٹ اہم ءُ کڑد اس ادا کیک۔ نگران بنجائی وزیر پارے کہ تدوک آ 70 سال آتیٹی دوستانہ سلابت و بڑزکو کہولی رابطہ غاتا چرجوئی ہڑتوم آ آئرن ایلم پاکستان و چین نا نیام اٹ سیاسی امنائی سلاہ و تین پہ تینی پت ءِ پین سوگو کرینے۔ اوپارے کہ وزارت حوالکاری وشینکاری اسیجائی فائدہ غاتا بشخ آتیٹی چائنیز انٹرپرائزز ءِ ہرممکن کمک فراوان کننگ اٹ تینا کڑد ءِ ادا کیک۔ نگران بنجائی وزیر پارے کہ وزارت حوالکاری نا ملحقہ ادارہ پاکستان ٹیلی ویژن، پاکستان براڈکاسٹنگ کارپوریشن و ایسوسی ایٹڈ پریس آف پاکستان مہالو آن میڈیا کمکاری ءِ ودفنگ کن تینا ہم عصر چینی ادارہ غاتون منظم فریم ورک اٹ مشغول ءُ۔ اوداوخت آ سی پیک ڈٹ آتیٹی السی جمہوریہ چین نا سفارت خانہ نا کمک و کوشست آتا ہم ستاءِ کرے۔
