اسلام آباد۔ 06 نومبر (اے پی پی) نگران وزیراعظم انوارالحق کاکڑ پارینے کہ بنداوی جان جوڑی نا آسراتی ہر پاکستانی نا حق ءِ و حکومت لس بندغ نا اوفتسکان رسینگ ءِ پک کیک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانیءِ او جہانی ادارہ جان جوڑی نا پاکستان اٹ نمائندہ ڈاکٹر پالیتھا ماہی پالاتون گپ وتران کرسا کرے ہرا دوشنبے نادے آ داڑے اوڑتون اوڑدہی کرے۔ اوڑدہی ٹی نگران بنجائی وزیر جان جوڑی ڈاکٹر ندیم جان و تعلقدار بڑزکو کمامدارآک ہم ساڑی ئسر۔ اوڑدہی ٹی وزیراعظم جہانی ادارہ جان جوڑی و ایلو شریدار آتا پاکستان نا جان جوڑی نا بشخ اٹی اصلاحات اٹ کمکاری آ منت واری ءِ ہرفے۔ اوڑدہی ٹی وزیراعظم جہانی ادارہ جان جوڑی ناکنڈآن مچ آپاکستان بشمول گلگت بلتستان و آزاد کشمیر اٹی بنداوی جان جوڑی ہند آتا اپ گریڈیشن نا گام آ خراج تحسین پیش کرے۔ اوڑدہی ٹی وزیراعظم پارے کہ جہانی ادارہ جان جوڑی نا عطیہ کروک موبائل ہیلتھ کلینکس و ایمبولینس آتیان بنداوی جان جوڑی نا آسراتی لس بندغ نا درگہ اسکان سرکننگک۔ مر مر انگا علاقہ غاتیٹی رہینگوک مخلوق اسکان بنداوی جان جوڑی نا آسراتی تے سرکننگ کن موبائل ہیلتھ یونٹ اہم اہمیت اس تخک۔ اوپارے کہ بنداوی جان جوڑی نا آسراتی ہرپاکستان نا حق ءِ و حکومت لس بندغ نا اوفتسکان رسینگ ءِ پک کیک۔ اوڑدہی ٹی وزیراعظم ءِ معلومدار کننگاکہ پاکستان اٹ 464 بنداوی جان جوڑی نا ہند آتا اپ گریڈیشن نا میگاپروجیکٹ آ کاریم بروک آ اِراتُو انا گونڈ مد اٹی پورو کننگک۔ وزیراعظم ءِمستی پاننگاکہ موبائل ہیلتھ یونٹ آک نئےبیرہ مخلوق ءِ درمان نا بنداوی آسراتی فراوان کیرہ بلکن ڈیجیٹل نظام نا رداٹ دا یونٹ جان جوڑی نا مرکزی نظام تون گنڈوک مریک و ناجوڑ آتے بھلا ہسپتال آتیٹی ریفرہم کننگ کیک۔ اوکان پد وزیراعظم جہانی ادارہ جان جوڑی و وزارت قومی جان جوڑی نا نیام اٹ لیٹرآف انڈر سٹینڈنگ آ دستخط نا دود اٹی بشخ ہلک۔ وزیراعظم جہانی ادارہ جان جوڑی نا کنڈآن عطیہ کروک آ 5 ایمبولینس، اسہ موبائل کلینک و 2 ویکسی نیشن وین تا ہم جاچ ءِ ہلک۔
