سیکورٹی فورس آتیا جلہو و حساس تنصیب آتیا جلہو کروک آ دہشت گرد آک اسہ وڑاسے ٹی ہم ملک و قوم انا خیر خواہ مننگ کپسہ، سیاسی راہشون و وزیراعلیٰ بلوچستان نا مسکوہی سلاہکار زرک خان مندوخیل

کوئٹہ۔ 06 نومبر (اے پی پی)  سیاسی راہشون و وزیراعلیٰ بلوچستان نا مسکوہی سلاہکار زرک خان مندوخیل پارینے کہ سیکورٹی فورس آتیا جلہو و حساس تنصیب آتیا جلہو کروک آ دہشت گرد آک اسہ وڑاسے ٹی ہم ملک و قوم انا خیر خواہ مننگ کپسہ، دہشت گردی ٹی اوار زموار آتا برخلاف کانود نا رداٹ کارروائی کننگے، الس نا رکھ اکن تینا جون تےندر کروک آسیکورٹی ادارہ غاتا شہید آک ننا قومی ہیروک ءُ ہرافتا قربانیک زیان مفسہ۔ داڑے جاری مروک اسہ بیان اسے ٹی زرک خان مندوخیل گوادر نا علاقہ ٹی سیکورٹی فورس آتا گاڈی تیا دہشت گرد آتا جلہو اٹی 14 سیکورٹی کارندہ غاتا شہیدی نا مذمت ءِ کرسا پارینے کہ الس نا جان و مال انا رکھ و سیم تا رکھ اکن تینا جون تے ندر کروک آکارندہ غاتا قربانیک انشاء اللہ زیان مفسہ ، پاک فوج و ایلو سیکورٹی ادارہ غاک زوت ملک آن دہشت گرد آتے پورو چٹفرہ۔ اودہشت گرد آتا جلہو اٹی شہید مروک آ سیکورٹی فورس آتا کارندہ غاتا خاہوت آتون ہڑزخواہی کرسا پارے کہ بلوچستان ناا لس اوفتا غم اٹی بریبر نا شریک ءُ۔ اومیانوالی ٹی پی اے ایف ٹریننگ بیس آ جلہو نا مذمت ءِ کرسا جلہو اٹی اوار دہشت گرد آتے کسفنگ و جلہو ءِ بے سہب کروک آ سیکورٹی فورس آتے خراج تحسین پیش کرے۔ اوپارے کہ پاک فوج و ایلو سیکورٹی ادارہ غاک ملک آن دہشت گردی نا چٹفنگ کن سنبرینگوک ءُ و زوت ملک آن دہشت گرد آتے پورو چٹفنگک ۔ اوپارے کہ سیکورٹی فورس و تنصیب آتیا جلہو اٹی اوار دہشت گرد آک ملک و قوم انا دشمن ءُ، ہراہچ ءُ حقدار اس افس اوفتا برخلاف کانود نا رداٹ کارروائی کننگے ۔