اسلام آباد۔ 06 نومبر (اے پی پی) پاکستان و جہانی ادارہ جان جوڑی ،جان جوڑی نا بشخ اٹی کمکاری کن مفاہمت نا یات داشت آتیا دستخط کریر۔ دستخط آتا دود دوشنبے نادے آ داڑے اڈ ہلک ہراٹی نگران وزیراعظم انوارالحق کاکڑ ، نگران وزیر قومی جان جوڑی ڈاکٹر ندیم جان، سیکرٹری ہیلتھ افتخار علی شلوانی و ڈی جی ہیلتھ ڈاکٹر بصیر اچکزئی ئسک ہم ساڑی ئسر۔ مفاہمت نا یات داشت آ سیکرٹری قومی جان جوڑی افتخار شلوانی و جہانی ادارہ جان جوڑی نا کنٹری ڈائریکٹر ڈاکٹر پالیتھا ماہیپالا مفاہمت نا یات داشت آ دستخط کریر۔ داوخت آ ڈائریکٹر جنرل ہیلتھ ڈاکٹر بصیر اچکزئی حوال اٹی پارے کہ درمان کن یونیورسل ہیلتھ کوریج حکومت نا اولیت ءِ، و دامسخت کن اقوام متحدہ ناجنرل اسمبلی ٹی ہم مچ آ دنیا ٹی یونیورسل ہیلتھ کوریج نا باندات آ شرہ کننگا۔ مچ آ ملک اٹی یونیورسل ہیلتھ کوریج نا بنا ءِ کرینے۔ داڑکن پاکستان اٹ جہانی ادارہ جان جوڑی طبی ازباب، ایمبولینس و موبائل یونٹ آتا فراوانی، لیبرروم و جان جوڑی نا بنداوی و ثانوی آسراتی تے گچین کننگ کن ننا کمک ءِ کننگ ءِ۔ اوپارے کہ جہانی ادارہ جان جوڑی مرمر انگا علاقہ غاتیٹی 450 آن زیات جان جوڑی ہند آتیٹی گاڈی تتون اوار درمان نا آسراتی فراوان کننگ ءِ ہراڑان مخلوق ءِ جان جوڑی نا گچین آسودہی دُوبننگ کیک۔ داوخت آ وزیراعظم ءِ ایمبولینس و موبائل ہیلتھ یونٹ آتا چابی تننگا۔ وزیراعظم جہانی ادارہ جان جوڑی نا کنڈآن تروک آ ایمبولینس آتا معائنہ ءِ ہم کرے۔
