بیجنگ۔ 06 نومبر (اے پی پی) چین پارینے کہ جہانی برادری غزہ ٹی بگڑینگوک آ انسانی حالیت آتیا چکارکے۔ چینی خبررساں ادارہ نارداٹ چینی وزارت خارجہ نا ترجمان وانگ وین بین پریس کانفرنس اٹ فلسطین اسرائیل جنگ آن ودی مروک آ انسانی المیہ نا بابت سوج انا ورندی ٹی پارے کہ ساڑی آ جنگ اٹی 11 ہزار آن زیات بندغ زوال کرینو۔ جہانی برادری داوڑنا سانحہ غاتا چرجوئی ءِ بایدے تورے۔ ترجمان پیدوار کرے کہ اقوام متحدہ نا جنرل اسمبلی نا ساڑی آ ہلہلہ ئی خصوصی دیوان بھلو گیشتری اسے اٹ اسہ قرارداداس منظور کرے۔ ہراٹی تعلقدار فریق آتیان کانود نا رداٹ دمدستی وڑاٹ جنگ بندی نا خواست کننگا، جہانی انسانی کانود نا رداٹ لس شاری، شاری تنصیب و افرادی عملہ و تنصیب آتا شرف و رکھ ءِ کننگک و ’’ دوریاستی حل‘‘ نا عزم انا درشانی ءِ کننگا۔ دا جہانی برادری نا سوگو توار نا ڈیک ءِ ایتک۔ وانگ وین بین پارے کہ سلامتی کونسل نا ساڑی چیئرمین ملک اناحیثیت اٹ چین فلسطین اٹ امن نا بحالی کن تینا پورو کوشست کیک و تنازع ٹی ثالثی، تناؤ ءِ کم کننگ و فلسطین نا ویل ءِ دوریاستی ایسری نا کنڈآ پدی اتنگ کن جہانی برادری تون اورای اٹ کاریم کیک۔
