راولپنڈی۔ 03 نومبر (اے پی پی) اینٹی نارکوٹکس فورس (اے این ایف ) منشیات اسمگرآتا برخلاف کارروائی ٹی 343 کلوگرام منشیات دوئی کرسا 2 دوبہ دار آتے دزگیرکرے۔ اے این ایف ترجمان پارے کہ انٹیلی جنس حوال آ اے این ایف دینہ چیک پوسٹ آ سوزوکی مہران گاڈی اسے توننگ نا کوشست کرے ولے دوبہ دار آک گاڈی ءِ توننگ نا جاگہ غا نرفنگ نا کوشست کریر۔ اے این ایف ٹیم تعاقب کرسا گاڈی ءِ ڈومیلی چوک جہلم نا خڑک توریر ہراڑآ اسہ ایلو آ سم کاری ٹی اسہ اے این ایف کارندہ سے نا نت اٹی سم اس لگنگ آن ٹھپی مس ہرادے دمدستی وڑاٹ درمان نا غرض اٹ ہسپتال آ گدریفنگا ہراڑے کارندہ نا حالیت خطرہ غان پیشن پاننگ انگ ءِ۔ سم کاری ٹی اسہ ٹھپی دوبہ دار اسے سنگت تون اوار دزگیر کننگا وخت اس کہ اسہ دوبہ دار اس نرا ہرانا پٹنگ برجاءِ پٹنگ آ گاڈی آن 277 کلو 200 گرام چرس و 67 کلو 200 گرام ہفیم دوئی کننگا۔ دوبہ دار آتا برخلاف انسدادِ منشیات ایکٹ نا رداٹ مقدمہ نوشتہ کرسا مستی جاست پاست نا بناءِ کننگانے۔
