کوئٹہ۔ 03 نومبر (اے پی پی) نگران وزیراعلیٰ بلوچستان میر علی مردان خان ڈومکی صوبہ ٹی سرکاری کہول آ الس ءِ مفت درمان نا آسراتی تا فراوانی نا پڑو ءِ کرسا بلوچستان ہیلتھ کارڈ انا باقاعدہ بناءِ کرے۔ جمعہ نادے آ وزیراعلیٰ سیکرٹریٹ اٹ اڈہلوک دود اٹی دا تاریخی گام انا بناءِ کننگا و نگران وزیراعلیٰ بلوچستان اسہ ہندی شاری اسے نا ہیلتھ کارڈ پروگرام اٹی رجسٹریشن آن بلوچستان اٹی ہیلتھ کارڈ پروگرام نا بناءِ کرے۔ دود آن تران کرسا نگران وزیراعلیٰ میر علی مردان خان ڈومکی پارے کہ اینو آن بلوچستان نا غٹ شاری تے سرکاری کہول آ جان جوڑی نا وخت آ آب اٹ آسراتی فراوان کننگ نا زمواری ءِ ہرفنہ، و داسہ بےپرخ رنگ و نسل بلوچستان نا ہر بندغ نا درمان اونا شناختی کارڈ آ مفت مریک، داپروگرام نا رداٹ صوبہ نا ہربندغ ءِ اسہ وڑ درمان نا آسراتی دُوبریک و بلوچستان نا ہر شاری نا درمان مچ آ ملک انا 1200 آن زیات پینل ہسپتال آتیٹی سرکاری خڑچ آتیا مریک۔ میر علی مردان خان ڈومکی پارے کہ نن پیدوار پارت جاری کرینن کہ مریض آتا درمان تون عزت نفس و وقار نا ہم خیال ءِ تخنگک و ہرگام آ مریض آتا کمکاری و راہشونی ءِ پک کننگے۔ اوپارے کہ بلوچستان ہیلتھ کارڈ پروگرام نا رداٹ مریض بیدس اڑاند اسے آن پینل آ ساڑی سرکاری یا پرائیویٹ ہسپتال آ ہنسا دمدستی درمان نا بناءِ کرفنگ کیک۔ دود آن گران صوبائی وزیر جان جوڑی ڈاکٹر امیر محمد جوگیزئی، چیف سیکرٹری بلوچستان شکیل قادر خان ، سیکرٹری جان جوڑی عبداللہ خان، ہیلتھ کارڈ پروگرام نا چیف ایگزیکٹیو آفیسر اسداللہ کاکڑ بلوچستان ریونیو اتھارٹی نا سروک نورالحق بلوچ، اسٹیٹ لائف انشورنس نا چیف ایگزیکٹیو آفیسر شعیب جاوید حسین، نادراکن ڈائریکٹر جنرل ازرک خان ئسک ہم تران کریر وخت اس کہ نگران صوبائی وزیر داخلہ میر زبیر خان جمالی، صوبائی وزیرتعلیم ڈاکٹر قادر بخش بلوچ، وزیر حوالکاری و پبلک ریلیشنز جان اچکزئی سلاہکار آبپاشی میر دانش لانگو، سلاہکار معدنیات میر عمیر محمد حسنی، آئی جی پولیس عبدالخالق شیخ تون اوار بڑزکو کمامدارآک ہم دود اٹی ساڑی ئسر۔
