نگراں وزیر ڈٹ بندی محمدسمیع سعیدنا کماشی ٹی نیشنل پرائس مانیٹرنگ کمیٹی نا دیوان

اسلام آباد۔ 02 نومبر (اے پی پی) نگراں وزیر ڈٹ بندی شونداری و خصوصی گام گیج ، محمد سمیع سعید کوڑی کروک و منافع خور آتا برخلاف کارروائی ءِ پین سخت کننگ نا پارت کرینے ۔ اوداپارت ءِ پنچ شنبے نادے آ داڑے نیشنل پرائس مانیٹرنگ کمیٹی (این پی ایم سی) نا دیوان نا کماشی ءِ کرسا تس۔ دیوان اٹی کنوئی آ گڑاتا نہاد آتا جاچ ءِ ہلنگا، وخت اس کہ تعلقدار بنجائی و صوبائی کمامدارآتے پارت کننگا کہ لس بندغ ءِ ریلیف فراوان کننگ کن کنوئی آ گڑاتا نہاد آتے استحکام اتیر تانکہ لس بندغ ءِ زیات آن زیات ریلیف فراوان کننگ مرے۔ دیوان اٹی سیکرٹری وزارت ڈٹ بندی اویس منظور سمرا، چیف ادارہ شماریات، ہر چار آ صوبہ غاتانمائندہ، فیڈرل بورڈ آف ریونیو(ایف بی آر) وزارت قومی غذائی رکھ و پٹ وپول و ایلو تعلقدار شریدارآک بشخ ہلکر۔ دیوان اٹی ادارہ شماریات نا کمامدارآک کنوئی آ گڑاتا نہاد و کبینی نا حساب وکتاب آ اسہ سرجم ءُ حوال اس تسر وخت اس کہ پنجاب ، خیبرپختونخوا ، سندھ و بلوچستان نانمائندہ غاک خولم، بورہ و ایلو المی آگڑاتا ساڑی آ پیدوار و فراوانی نا بارواٹی فورم ءِ معلومدار کریر۔ نگراں وزیر ڈٹ بندی کوڑی کروک و منافع خور آتا برخلاف کارروائی ءِپین سخت کننگ نا پارت جاری کرے۔ اوصوبائی حکومت آتے پارت کرے کہ او تینا تعلقدار کمشنر، ڈپٹی کمشنر و مجسٹریٹ آتے کوڑی کروک آتا برخلاف  کارروائی کننگ کن پارت جاری کیر۔ دیوان اٹی پاننگاکہ سپلائی چین نا نظام اٹ توازن ءِ برقرار تخنگ و اونا سخت مانیٹرنگ کن ادارہ شماریات نا کنڈآن جوڑ کروک آایپ نا رسینگ غٹ صوبہ غاتے تسنے تانکہ صوبہ غاتیٹی  کنوئی آ گڑاتا نہاد آتا چاروکی،صارف آتیکن اوفتا فراوانی و نہاد آتے کنٹرول کننگ مرے۔