اسلام آباد۔ 02 نومبر (اے پی پی) نگراں بنجائی وزیر حوالکاری و شینکاری مرتضیٰ سولنگی موسمیاتی بدلی نا خطرہ و نسخان تتون مون تننگ کن اجتماعی کوشست آتا گرج آ زور شاغسا پارینے کہ ننے بروک آ چین تا آخبت ءِ رکھ کروئی مریک، کرہ ارض موسمیاتی بدلی تا خطرہ غاتا گواچیءِ، حکومت یا محکمہ اس تنیا دا خطرہ تون مون تننگ کپک، موسمیاتی بدلی تا چیلنج تون مون تننگ کن ننے سٹریٹجک وژن نا گرج ءِ، موسمیاتی بدلی تیان زہمی ملک آتیکن جہانی برادری ءِ تینا کڑد ءِ ادا کروئی مریک۔ داخیال آتا درشانی ءِ او پنچ شنبے نادے آ داڑے ’’پری کوپ۔ 28 ‘‘ سیمینارآن تران کرسا کرے۔ نگران بنجائی وزیر حوالکاری پارے کہ کرہ ارض انا درجہ حرارت ودنگ ءِ، حکومت یا ادارہ اس تنیا موسمیاتی بدلی نا خطرہ و چیلنج آتون مون تننگ کپک، دا ویل انا اہمیت مچ آ راج ءِ امنا کروئی مریک۔ اوپارے کہ ننے موسمیاتی بدلی نا خطرہ غاتون مون تننگ کن شجرکاری ٹی زیات آن زیات بشخ ہلوئی مریک، دارداٹ راج اٹ سوچ ءِ بدل کروئی مریک۔ اوپارےکہ موسمیاتی بدلی نا بابت چناتیٹی شعور تالان کروئی مریک، دا رداٹ لمہ و استاد آک تینا کڑد ءِ ادا کننگ کینہ، نن تینا کلچر اٹ موسمیاتی بدلی نا اہمیت ءِ تالان کرسا اونا خطرہ تون مون تننگ کینہ۔ اوپارے کہ موسمیاتی بدلی نا بارواٹی میڈیا ءِ ہم تینا کڑد ءِ ادا کروئی مریک، نن پاکستان ٹیلی ویژن اٹ موسمیاتی بدلی نا بابت اسپیشل ڈیسک انا بناءِ کننگ والا اُن۔ اوپارے کہ پاکستان ءِ سموگ و نوکاپ کون آ ویل مون تروک ءِ ہرا انسانی وجود کن خطرہ نا سوب ءُ، نن تینا دا ویل اتون مون تننگ کپنہ، داڑکن ننے غٹ ءِ اواری اٹ جہد کروئی مریک۔ اوپارے کہ موسمیاتی بدلی نا لحاظ اٹ پاکستان بے رکھ ءُ ملک اسے، دا بھسکاری ٹی ننا تینا ہچ ءُ کڑد اس اف ولے داڑان نن غٹ آن زیات زہمی مننگ اُن۔ اوپارے کہ موسمیاتی بدلی نا چیلنج تون مون تننگ کن ننے سٹریٹجک وژن نا گرج ءِ۔
