اسلام آباد۔ 02 نومبر (اے پی پی) اسپیکر قومی اسمبلی راجہ پرویز اشرف پارینے کہ صحافی تا برخلاف ڈوہ تا چٹفنگ وخت انا اہم ءُ گرج اسے انتئے کہ ساڑی آ دور اٹی صحافت ءِ ریاست نا اہم تمبہ و جمہوریت نا بنداوی جزو مننگک۔ صحافی تابرخلاف ڈوہ تا چٹفنگ نا جہانی دے انا وخت آ تینا کلہو اٹی اوپارے کہ ہرسال مچ آ دنیا ٹی سد آصحافی تینا کسبی زمواری تے پورو کرساشہید و بیدادی نا شست مریرہ، جمہوری و انصاف پسند راج انا ٹہیفنگ کن صحافی برادری نا برخلاف مروک آ ڈوہ انا چٹفنگ المی ءِ۔ اوپارے کہ اقوام متحدہ غزہ و بھارت اٹی صحافی تیا سرے عام مروک آ دہشت گردی و دنیا نا ایلو بشخ آتیٹی مروک آ ڈوہ تا نوٹس ءِ ہلے۔ اونا پاننگ ئس کہ پاکستان نا پارلیمان و پیپلزپارٹی مدام صحافی تا رکھ ءِ پک کننگ اٹ پبی کڑد ادا کریر ، شہید گودی بینظیر بھٹو و پیپلزپارٹی صحافت آ بیٹ مون انگا کانود نا چٹفیر، نن آجوئی صحافت و صحافی تے بے خوف و خلیس تینا صحافتی زمواری تے پورو کننگ کن سازگار چاگڑد اس فراوان کننگ آ یخین تخک۔ راجہ پرویز اشرف پارے کہ ملک اٹی جمہوریت نا بحالی و جمہوری ادارہ غاتا سوگوی کن صحافتی برادری نا جہد ستاکڑزک۔ اوپارے کہ صحافی برادری نا رکھ ننا جہد نا اہم پلو ءِ، میڈیا نا آجوئی و صحافی تا حق انا رکھ اکن ہر فورم آ توار بڑز کرسا کینہ۔
