اسلام آباد۔ 02 نومبر (اے پی پی) نگران وزیراعظم انوارالحق کاکڑ اقتصادی کمکار تنظیم (ای سی او) نا سروک دیوان اٹی بشخ ہلنگ کن ازبکستان نا دورہ ءِ کیک۔ دفترخارجہ نا ترجمان ممتاز زہرہ بلوچ پنچ شنبے نادے آ پریس حوال اٹی پارے کہ وزیراعظم 8 و 9 نومبر آ ازبکستان نا دارالحکومت تاشقند اٹی اقتصادی کمکار تنظیم ناسروک دیوان اٹی بشخ ہلیک۔ ترجمان پارے کہ وزیراعظم دیوان اٹی بشخ ہلوک آ باسک ملک آتا سروک آتون ہم اوڑدہی کیک۔ ترجمان فلسطین نا بابت ہیت کرساپارے کہ پاکستان ءِ فلسطین نا حالیت آتیا گڑتی ءِ۔ اسرائیل نا کوزہ گر فوج فلسطین اٹ جنگی ڈوہ انا ارتکاب کننگ ءِ، تدوک آ دے سینیٹ دیوان اٹی فلسطینی تیا مروک آ ظلم انا برخلاف قرارداد منظور کننگا، اقوام متحدہ ءِ غزہ ٹی گھیڑ انا چٹفنگ، بمباری ءِ توننگ و انسانی بنداو تیا کراسنگ ءِ ملنگ آ زور شاغنگے۔ ترجمان پارے کہ بھارت نا غیرکانودی وڑاٹ کوزہ ٹی جموں وکشمیر اٹی بھارتی ظلم برجاءِ، اوپارے کہ بھارتی ایجنسی پاکستان اٹ جاسوسی، دہشت گردی و شرپسندی ٹی اوار ءِ۔ اسہ سوج اسےنا ورندی ٹی ممتاز زہرہ بلوچ نا پاننگ ئس کہ پاکستان اٹ غیرکانودی وڑاٹ رہینگوک درملکی تا برخلاف ایمیگریشن ڈٹ آتیا عملدرآمد نا بناءِ کرینے۔ پاکستان اسہ تُو مست غیرکانودی وڑاٹ رہینگوک درملکی تے اِلنگ نا وارننگ جاری کریسس۔
