پاکستان و برونائی دارالسلام نا نیام اٹ گچین تعلقداری تا ماس اسیجائی مذہبی قدر و تین پہ تینی کمکاری آ قائم ءُ، چیئرمین سینیٹ

اسلام آباد۔ 02 نومبر (اے پی پی) چیئرمین سینیٹ محمد صادق سنجرانی پارینے کہ پاکستان و برونائی دارالسلام نا نیام اٹ گچین ہڑتوم آ کنڈآتا تعلقداری ءِ ہرافتا ماسک اسیجائی مذہبی قدر و تین پہ تینی کمکاری آ قائم ءُ۔ سینیٹ سیکرٹریٹ آن جاری بیان نا رداٹ داخیال آتا درشانیءِ او برونائی دارالسلام نا ہائی کمشنر پی جی کمال باشاہ پی جی احمد تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی تین پہ تینی است خواہی نا امور تون اوار ڈیہہ انا جم حالیت آتیا گپ وتران کننگا۔ چیئرمین سینیٹ بطور ہائی کمشنر تعیناتی آ اودے مبارکباد ی تس و نیک است خواہی نا درشانی ءِ کرسا پارے کہ اومیتءِ  نما تعیناتی آن پاکستان وبرونائی دارالسلام نا تعلقداری پین گچین مریک۔ چیئرمین سینیٹ محمد صادق سنجرانی پارے کہ پاکستان و برونائی دارالسلام نا نیام اٹ گچین ہڑتوم آ کنڈآتا تعلقداری ءِ، ہرافتا ماسک اسیجائی مذہبی قدر و تین پہ تینی کمکاری آ قائم ءِ۔ اوڑدہی ٹی برونائی دارالسلام تون واپار ، کاروبار ، زرکاری و اقتصادی بشخ آتون اوار ہڑتوم آ کنڈآتا رابطہ ءِ پین ودفنگ نا گرج آ زور شاغنگا۔ چیئرمین سینیٹ پارے کہ پاکستان زرکاردوست پالیسی تیا عمل کننگ ء، واومیت ءِ کہ برونائی دارالسلام نا زرکارپاکستان اٹ توانائی، کشت وکشار، تعلیم و ایلو بشخ آتیٹی زرکاری آ سجفرہ۔ محمد صادق  سنجرانی پارےکہ ہڑتوم آ ایلم ملک آتا نیام اٹ اسلاموفوبیا ، اسلامی کمکار تنظیم (او آئی سی ) نا تہہ ٹی کمکاری و جہانی امن نا بابت ویل آتون اوار چندی امور آ پت انا رشتہ ساڑی ءِ۔ چیئرمین سینیٹ گونڈ آبی  وسیلہ غاتا گچین کاریم اٹ اتنگ و پوسکن آ ٹیکنالوجی ءِ کاریم اٹ اتسا پیدواری لائخی تے ودفنگ کن کشت وکشار نا بشخ اٹی ہڑتوم آکنڈآتا کمکاری نا گرج آ زور شاغا۔ محمد صادق سنجرانی پارے کہ پاکستان اٹ زرکاری نابھلو وارخواہی اس ساڑی ءِ۔ ہڑتوم آ ملک آتا پوریاگر و زرکارآک ساڑی آ وارخواہی تیان فائدہ ہرفر۔ چیئرمین سینیٹ پارے کہ اقتصادی و زرگزرانی بشخ آتیٹی گچین حکمت عملی اختیار کرسا گچینی اتنگ مریک۔ چیئرمین سینیٹ مقبوضہ جموں وکشمیر و فلسطین نا ساڑی آ تشویشناک حالیت و انسانی حق انا بدترین لتاڑتیاہم گپ وتران کرے۔ چیئرمین سینیٹ  پارے کہ کشمیر نا ویل و فلسطین نا ایسری کن جہانی واکدار آتے تینا کڑد ءِ ادا کننگ نا گرج ءِ۔ مون تروک ویل آتا ایسر اقوام متحدہ کن اسہ چیلنج و امتحان اسے۔ مسلم امہ ءِ اسیجائی لائحہ عمل اس اختیار کرسا  مقبوضہ کشمیر و فلسطین اٹ برجاظلم و بربریت  ءِ چٹفوئی مریک۔ برونائی دارالسلام نا سفیر پارے کہ برونائی دارالسلام، پاکستان تون ہڑتوم آ کنڈآتا تعلقداری تے ودفنگ نا خواہندار ءِ۔ ڈیہہ اٹی امن کن پاکستان نا کوشست ستاکڑزک۔