اسلام آباد۔ 01 نومبر (اے پی پی) نگران بنجائی وزیر داخلہ سرفراز بگٹی پارینے کہ او ڈیتھ اسکواڈز نا تذکرہ ٹی بی این پی مینگل و سردار اخترمینگل نا اسہ جاگہ اس ہم پن ءِ ہلتنے، اخترمینگل تدوک آپنچ سال اٹی حکومت آتا بشخ رہینگانے او ہمووخت آ بے گوا بندغ آتا ویل ءِ انت اکن ہرفتو؟ چارشنبے نادے آ سینیٹ نا دیوان اٹی سینیٹر محمد قاسم نا اعتراضی ٹک انا ورندی ٹی وزیرداخلہ پارے کہ بی این پی مینگل بے گوا بندغ و ڈیتھ اسکواڈنا باندات آ دھرناتس، قدوس بزنجو نا وزارت اعلیٰ نا دور اٹی بلوچستان حکومت نا ہم غیراعلانیہ بشخ رہینگا، پی ٹی آئی نا سیوتی رہینگا، پی ڈی ایم نا حکومت اٹی ہم اوار رہینگا، ہمووخت آ ہرافورمک ئسر اوفتے بے گوا بندغ آتا ویل ءِ ہرفنگ کن بایدے کاریم اٹ اتنگوسس۔ اوپارے کہ ڈیتھ اسکواڈ اٹ بی ایل اے اوار ءِ ہرا 5 ہزار بے گناہ شاری تے شہید کرینے۔ بلوچستان اٹی پنجابی، استاد، پروفیسر و ڈاکٹر آتے شہید کننگانے ہرافتے ٹی 30 سال خوانفنگ نا بشخ اتون وابستہ رہینگوک آ پروفیسر ناظمہ طالب ہم اوار ءِ۔ بی ایل اے داواقعہ نا زمواری ءِ امنا کرے و او ایلو واقعہ غاتا ہم زمواری ءِ قبو ل کرساکرینے۔ ہندا وڑ بی آراے، یوبی اے ، بی ایل ایف، مجید بریگیڈ ءِ، بی ایل اے نا کماشی ءِ حیربیارمری، یوبی اے کماشی ءِ اونا چنکا ایلم زمران مری، بی آراے نا کماشی ءِ براہمداغ بگٹی، بی ایل ایف نا کماشی ءِ ڈاکٹر اللہ نذر، بی آر اے اچھوگروپ نا کماشی ءِ بشیر زیب و لشکر بلوچستان نا کماشی ءِ جاوید مینگل ئسک کننگ ءُ ۔ اوفتے ٹی اسہ جاگہ اس ہم بی این پی مینگل و سردار اخترمینگل نا نن پن ءِ ہلتنون، نن تو اودے داتنظیم تتون اوار کتون، اگہ دا تینٹ تینے اوفتے تون اوار کننگ خواہک تو دا اونا مرضی ءِ۔
