اسلام آباد۔ 01 نومبر (اے پی پی) نگران وزیراعظم انوارالحق کاکڑ گلگت بلتستان نا الس ءِ جنگ آزادی گلگت بلتستان نا 76 سال پورو مننگ آ مبارکبادی پیش کرساپارینے کہ گلگت بلتستان نا مخلوق ءِ بے مثل قربانی تیان آجوئی نا نعمت ملا، حکومت پاکستان گلگت بلتستان اٹ شونداری، امن، شونہالی و ورناچین نا گچینی کن پبی کڑد ادا کرساکیک، قومی یکجہتی مذہبی ہم گرنچی و پرامن بقائے باہمی نا کمک اٹ دشمن نا ناپاک مسخت آتے بے سہب کروئی مریک۔ چارشنبے نادے آ نگران وزیراعظم انوارالحق کاکڑ گلگت بلتستان نا جنگ آزادی نا 76 سال پورو مننگ نا وخت آ تینا کلہو اٹی پارے کہ اینو نا دے گلگت بلتستان و مچ آ پاکستان کن بے کچ اہمیت تخک، و ننا تاریخ اٹ اسہ اہم ءُ مزل اسے نا حیثیت تخک، اینو آن 76 سال مست گلگت بلتستان نا غیور الس پاکستان نا جوڑ مننگ آن پد ڈوگراراج نا برخلاف کیپٹن مرزا حسن خان و صوبیدار میجر بابر کون آ نرزور و جری راہشون آتا کماشی ٹی بے سروسامانی آن پد ہم بے کچ نرزوری و دلیری نا درشانی ءِ کریر و ہندو سامراج نا کٹھ پتلی گورنر گھنساراسنگھ ءِ سلہہ بِٹنگ آ بیوس کریر و گلگت بلتستان نا نرزور مخلوق پاکستا ن تون الحاق ءِ اولیت تسر۔ اوپارے کہ گلگت بلتستان نا آجوئی ننا میرات و سرمایہ ءِ افتخار ءِ و تینا وڑنا یکتا کارنامہ ءِ ہرانا تاج ءِ گلگت بلتستان نا باتیک یکم نومبر 1947 آ تینٹ پاکستان نا کاٹم آ خلکر و تینا غیر مشروط ، بے مثل و والہانہ مریبت اٹ پک کریر کہ نن پاکستان نا شونداری و سوگوی کن ہروڑنا قربانی ایتنہ۔ ہنداسوب ءِ کہ مچ آ ملک داعالقہ نا جوزہ حب الوطنی ءِ قدر انا نظر اٹ ہرک، دا جری مخلوق مدامی کن دمشن ءِ داہم باور کرفیر کہ گلگت بلتستان پاکستان نا بشخ ئس، ارے و انشاء اللہ مدام سلک۔ وزیراعظم پارے کہ گلگت بلتستان نا مخلوق خوش قسمت ءِ کہ اوفتا بےمٹ قربانی تیان آجوئی نا نعمت ملا ولے افسوز کہ بھارت نا غیرکانودی کوزہ ٹی جموں وکشمیر نا مسلمانک اینو اسکان ہندوستان نا غاصبانہ پنجہ نا کیرغ آن ءُ۔ دُن تو کشمیر نا ویل انا ایسری کن اقوام متحدہ نا پیدوار قرارداد ساڑی ءِ ولے بھارت نا ضد و جہانی واکدار آتا خاموشی نا سوب آن کشمیر نا ویل داسکان ایسر مننگ کتنے۔ اوپارے کہ ای اینو اسہ وار ولدا بھارت نا غیرکانودی کوزہ ٹی جموں وکشمیر نا مظلوم الس تون یکجہتی نا درشانی ءِ کیوہ۔ اوپارے کہ پاکستان کشمیری تا پبی سیاسی ، سفارتی و اخلاقی کمک ءِ ہمووخت اسکان برجاتخک ہراتم اسکان کہ اوفتے اقوام متحدہ نا قررداد آتا رداٹ حق خودارادیت ملپک۔
