اسلام آباد۔ 01 نومبر (اے پی پی) چیئرمین سینیٹ محمد صادق سنجرانی غزہ نا جبالیہ مہاجر کیمپ آ اسرائیلی فضائی جلہو نا ترندی اٹ مذمت ءِ کرسا پارینے کہ غٹ دنیا انصاف، امن و کودک جان تا تقدس کن اوار بایدے سلر۔ سینیٹ سیکرٹریٹ آن جاری بیان نا رداٹ چیئرمین سینیٹ پارے کہ کودک زالبول و چناتا جون تے ہلنگ نا وحشیانہ فعل انسانیت نا ضمیر ءِ سرفوک آ بھیانک ظلم ءِ۔ مہذب دنیا ٹی داوڑنا گندہ انگا گام گیج آتا ہچ ءُ جاگہ اس اف۔ اوپارے کہ غٹ دنیا نا کنڈآن دا گندہ انگا عمل نا سخت بایدے مذمت ءِ کننگے۔ غزہ ٹی اسرائیلی بربریت انسانی حق و جہانی کانود نا بھلا خلاف ورزی ءِ۔ غٹ دنیا ءِ داوڑنا ظلم آتا برخلاف یکجا مروئی مریک۔ چیئرمین سینیٹ پارے کہ جہانی برادری دا بدترین بیدادی ءِ دمدستی وڑاٹ بند کننگ نا خواست کے۔ ننا است شہید مروک آ فلسطینی الس و اوفتا خاہوت آتیکن ڈکھیائی ءِ۔ غٹ دنیا انصاف ، امن و کودک جان تا تقدس کن بایدے اوار سلر۔
