اسلام آباد۔ 01 نومبر (اے پی پی) اسپیکر قومی اسمبلی راجہ پرویز اشرف غزہ نا جبالیاپناہ گزین کیمپ آ اسرائیلی بمباری نا ترند انگا لوز آتیٹی مذمت ءِ کرسا اوٹی 100 آن زیات کودک شاری تا شہیدی آ ڈکھیائی و ہڑزخواہی نا درشانی ءِ کرینے۔ چارشنبے نادے آ تینا مذمتی بیان اٹی پناہ گزین کیمپ آ اسرائیل نا وحشیانہ بمباری ءِ بے کچ است ہسون گوندسا پارے کہ اسرائیل ظلم انا غٹ حد آتیان گدرینگانے۔ اسرائیلی ظلم آن زالبول، چنا و کمکی کارندہ غاتسکان رکھ افس۔ اوپارے کہ غزہ غا اسرائیلی بمباری آن اقوام متحدہ نا 64 کمکی کارندہ زوال کرینو۔ دیکی واکدار آک اسرائیل نا کنڈآن غزہ غا وحشیانہ بمباری نا دمدستی نوٹس ءِ ہلیر۔ اوپارے کہ داسہ وخت بسنے کہ امت مسلمہ ءِ یکجا مرسا اسرائیل نا بربریت نا ورندی ءِ تروئی مریک۔ پاکستان نا پارلیمان و الس جہانی برادری آن پرزور خواست کیک کہ اسرائیلی بربریت نانوٹس ءِ ہلے۔ راجہ پرویز اشرف پارے کہ جنگ اسہ ہم ویل اسے نا ایسر اف، جہانی واکدارآک اواری اٹ تولسا فلسطین نا ویل انا دمدستی و دیرپا ایسری اس بایدے کشر۔کودک چنا، زالبول و بزرگ آتے اسرائیلی ظلم آن نجات ترفنگ مچ آ دنیا نا اجتماعی زمواری ءِ۔ پاکستان فلسطینی ایڑھ ایلم تا سیاسی و اخلاقی کمک ءِ برجاتخک ۔ اللہ تعالیٰ مظلوم فلسطینی تیا تینا رحم ءِ کے و ظالم آتے عبرت نا نشان کے۔
