اسلام آباد۔ 01 نومبر (اے پی پی) نگران وزیرخارجہ جلیل عباس جیلانی پارینے کہ فلسطین آ اسرائیلی جارحیت نا باندات آ پاکستان تون اوار غٹ اسلامی ملک آک جوان و اسہ وڑ موقف اختیار کرینو، غزہ ٹی دمدستی جنگ بندی کننگے، اسرائیل مقبوضہ علاقہ ءِ خورک کے، و فلسطینی تے انسانی بنداو تیا امداد نا دمدستی فراوانی ءِ پک کننگے۔ چارشنبے نادے آ سینیٹ نا دیوان اٹی بے گناہ فلسطینی تیا اسرائیلی ظلم انا برخلاف تحریک آ شرہ ءِ چٹفسا نگران وزیرخارجہ پارے کہ فلسطینی تیکن مدلل وڑاٹ توار بڑز کننگ آ ایوان ءِ خراج تحسین پیش کیوہ ہراوڑ کشمیر نا ویل متکن و ایسر نا چاری ءُ جھیڑہ اسے ہمووڑ فلسطین ہم دیرینہ ایسر نا چاری جھیڑہ ءِ، کشمیر نا ویل و فلسطین نا ویل انا بارواٹی اقوام متحدہ نا قرارداد ساڑی ءِ ولے اوفتیا عملدرآمد متنے۔ اوپارے کہ نن اینو فلسطینی تتون یکجہتی نا درشانی ءِ کننگ اُن۔ دا ننا مذہبی و قومی فرض ءِ ہراوڑاٹ فلسطین نا الس اسرائیل نا غاصبانہ کوزہ غان پد ظلم و جور انا گواچی ءُ، سد آ فلسطینی شہید مسنو اونامذمت ءِکینہ و فلسطینی الس تون یکجہتی نا درشانی ءِ کینہ ، اوفتا ہرممکن کمک ءِ کننگ قومی فرض ءِ و اہمیت تخک، اسرائیل تدوک آ 17 سال آن غزہ غا کوزہ گیرءِ۔ اوپارےکہ اسرائیل 7 اکتوبر آن پد ہموڑے ظلم وستم نا مش آ پرغنگ ءِ ہراوڑچنا و نیاڑی تے شہید کننگ انگ ءِ اونا ساڑی آ دور اٹی درور ملپک۔ اوپارے کہ یونیسیف نا ڈائریکٹر جنرل پارے کہ تدوک آ اِراہفتہ غان ہرا ظلم مننگ ءِ اوڑآن غزہ قبرستان نا منظر اس پیش کننگ ءِ۔
