اسلام آباد۔ 01 نومبر (اے پی پی) پارلیمنٹ نا ایوان بالا سینیٹ فلسطینی الس تون یکجہتی نا درشانی و اسرائیلی جارحیت وبربریت نا برخلاف مذمتی قرارداد نا امنائی سلاہ اٹ منظوری ءِتس۔ چارشنبے نادے آ سینیٹ نا دیوان اٹی قائد ایوان سینیٹر اسحاق ڈار قرارداد پیش کرے۔ قرارداد اٹی پاننگانے کہ سینیٹ آف پاکستان غزہ ٹی فلسطینی الس نا نسل کشی نا باندات آ تینا ہلہلہ ئی دیوان اٹی انسانیت نا برخلاف اسرائیلی ڈوہ و ریاستی دہشت گردی نا ترندی اٹ مذمت ءِ کیک، دنیا نا غٹ آن بھلا زندان غزہ نا مقبوضہ پٹی ٹی رہینگوک فلسطین نا کودک چنا، زالبول و نرینہ غاتا برخلاف ریاستی دہشت گردی کننگ انگ ءِ۔ ایوان پڑو کیوہ کہ ارٹ میکو جہانی جنگ انا ہولوکاسٹ آن پد اسہ ملک اس ہم داوڑنا بربریت و داوڑنا بھلو کچ اسے آ لس خون و جنگی ڈوہ تا ارتکاب کتنے۔قرارداد اٹی مظلوم فلسطینی تتون یکجہتی نا درشانی و اوفتا پورو مخ تفی و اسرائیل نا مخ تفی ءِ کروک آتا دوہرہ معیار و منافقت نا مذمت ءِ کننگانے انتئے کہ او غزہ ٹی دمدستی جنگ بندی نا مخالفت ءِ کرسا ڈوہ اٹی شریک ءُ۔
