لاہور۔ 01 نومبر (اے پی پی) آئی جی پنجاب ڈاکٹر عثمان انور چارشنبے نادے آ برجا اہم ویڈیو بیان اٹی پارینے کہ دنیا نا ہر ریاست تینا سیم تا رکھ اکن قاعدہ و ضابطہ نا رداٹ غیرکانودی پردیسی تا کشنگ نا حق تخک، پاکستانی ریاست غیرکانودی وڑاٹ رہینگوک آ غٹ درملکی شاری تے وطن ءِ اِلنگ کن بھلو وخت اس مست معلومدار کریسس، حکومت پاکستان نا پارت نا رداٹ غٹ شارتیان تخوک آ تاریخ آ غیرکانودی پردیسی تے پیشن گدریفنگک، درملکی شاری تے پیشن کشوک آ غٹ ٹیمک انسانی حق انا پاسداری ءِ پک کیرہ، انخلاآپریشن آ متعین غٹ ٹیمک باڈی کیم تون اوار ایلو ٹیکنالوجی آن ہرسرگرمی نا مانیٹرنگ ءِ پک کیرہ، پنجاب پولیس نا2 لکھ فورس حکومت پاکستان نا پارت آتا رداٹ درملکی شاری تا کشنگ کن پورو وڑاٹ تیار ءِ۔ آئی جی پارے کہ حکومت پاکستان نا پالیسی نا رداٹ کشنگ کن ضلع غاتے چندی تاریخ آتیٹی بشخنگانے، ہرابندغ تون پاکستان اٹ رہینگ انگ نا کانودی دستاویز ارے اوڑآن ہچ ءُ پوچھ گچھ اس مفک، کانود نافذ کروک آ ادارہ، انٹیلی جنس ادارہ، اسپیشل برانچ و ضلعی انتظامیہ حکومت پاکستان نا پالیسی آ من و عن عملدرآمد ءِ پک کیرہ، حکومت پنجاب درملکی شاری تا کشنگ نا عمل سپروائز کیک، بیدس غاو آن داعمل ءِ ایسر اسکان سرکننگک۔
