کوئٹہ۔ 01 نومبر (اے پی پی) آئی جی پولیس بلوچستان عبدالخالق شیخ پارینے کہ بلوچستان پولیس نا محکمہ سی ٹی ڈی صوبہ ءِ دہشت گردی آن رکھ تخنگ اٹ اہم کڑد ادا کننگ ءِ۔ کاؤنٹر ٹیررازم ڈپارٹمنٹ اسہ بے کچ خاص ءُ بشخ اسے ہرا صوبہ ٹی دہشت گردی ءِ توننگ و اوڑتون مون تننگ تون اوار اوار دہشت گرد تنظیم و اوفتا سرجزآتا بارواٹی انٹیلی جنس جمع کننگ، انسداد دہشت گردی نا کارروائی دُن کہ چھاپہ و دزگیری کننگ و انسداد دہشت گردی ٹی کانود نافذ کروک آ ایلو ادارہ غاتے تربیت و کمک فراوان کننگ آن بیدس الس تون اواری اٹ دہشت گردی نا بارواٹی شعور بیدار کننگ و و اودے توننگ کن کاریم کیک۔ شعبہ انسداد دہشت گردی (سی ٹی ڈی) انٹیلی جنس اتون اوار اوار دہشت گردی نا واقعہ غاتا جاست و پاست ءِ کننگ، ڈوہدار تے سزا ترفنگ و دہشت گرد آتا برخلاف کارروائی کننگ نا پبی لائخی تخک۔ پاکستان نا غٹ آن بھلا صوبہ بلوچستان جغرافیائی و راجی اعتبار اٹ بے کچ اہمیت تخک۔ ہندا جغرافیائی حالیت و اہمیت نا رداٹ دا ڈیہہ اٹی امن و ایمنی قائم و دائم تخنگ اسہ چیلنج اسے آن کم اف۔ صوبہ ٹی پائیدار امن ساڑی حکومت نا اولیت آتیٹی سرفہرست ءِ دا چرجوئی ٹی پولیس و ایلو کانود نافذ کروک آ ادارہ غاتا پوسکن آ طرز آ تربیت و ایلو باندات آتا گچینی کن چندی گام گیج آتے کننگ انگ ءِ ۔ داخیال آتا درشانی ءِ آئی جی بلوچستان پولیس ٹریننگ کالج کوئٹہ ٹی 839 آفیسر ہرافتے ٹی 11 اسسٹنٹ ڈائریکٹر 38 سارجنٹ، 790 کارپورل و ہندافتے ٹی 33 لیڈی آفیسر آتیا تالان 98 می بیچ نا پاسنگ آؤٹ پریڈ نا وخت آ تران کرساکرے۔ داوخت آ کمانڈنٹ پی ٹی سی محمد اشفاق عالم، ڈی آئی جی سی ٹی ڈی اعتزاز احمد گورایا، ڈی آئی جیز، اے آئی جیز، ایس ایس پیز آن بیدس ایلو سینئر پولیس آفیسر ، پاس آؤٹ مروک آ پولیس آفیسر آتا خاہوت، پولیس شہید آتا وارث و شرفمند آک دود اٹی بشخ ہلکر۔
