اسلام آباد۔ 31 اکتوبر (اے پی پی) انسٹیٹیوٹ آف میڈیا اینڈ سٹریٹجک سٹڈیز نا ڈائریکٹر محمد ضمیر اسدی پارینے کہ چین پاکستان اقتصادی راہداری ڈٹ ہڑتوم آ ملک آتا نیام اٹ اسہ پول اسے نا کڑد ءِ ادا کننگ ءِ، تدوک آ 10 سال اٹی سی پیک نا رداٹ 6 ہزار میگاواٹ بجلی، 5 ہزار کلومیٹر مریس شاہراہ،800 کلومیٹر بجلی نا پوسکن ءُ ٹرانسمیشن لائن، خصوصی اقتصادی زون و پوسکن روزگار نا وارخواہی آن بیدس بے شمار چنکو بھلو ڈٹ پورو کننگانے۔ داخیال آتا درشانی ءِ او اے پی پی تون خصوصی گپ وتران اٹی کرے۔ اوپارے کہ سی پیک اٹی ہراڑے بنداوی پنجر نا شونداری اولیت ءِ ہموڑے پاکستان و چین نا نیام اٹ دودوربیدہ ئی سرجزآتے مون آ دننگ ہم اوار ءِ تانکہ السی ہن و برتیٹی ودکی مننگ کے، دودوربیدہ ئی سرجزآتا بدولت ہڑتوم آ ملک آتا الس ءِ اسہ ایلو ءِ سمجھنگ نا موکل ملک۔ اونا پاننگ ئس کہ تدوک آ 10 سال اٹی سی پیک نا رداٹ پاکستان شونداری نا کیہی ریسہ غاتے سرسہبی اٹ طے کرینے ہرافتے ٹی 6 ہزار میگاواٹ توانائی، 5 ہزار کلومیٹر مریس شاہراہ تا اسہ جال و 800 کلومیٹر بجلی نا پوسکن ٹرانسمیشن لائن آتیان بیدس ایلو سرسہبیک اوار ءُ۔ اوپارے کہ سی پیک چینی صدر شی جن پنگ نا بیلٹ اینڈ روڈ انیشیٹیو نا بشخ ءِ، اونا شونداری نا اولیکو سرسہب دہائی آخبت نا ہدف آتا پیدوار کسر اس متعین کرینے۔ محمد ضمیر اسدی پارے کہ سی پیک مالیاتی چیلنج آتون مون تروک آ بھاز انگا ملک آتا گرج آتے پورو کننگ کن زرکاری نا ذریعہ جوڑمرسا مون آبسنے۔ اوپارے کہ جہانی کمکاری نا مسٹ میکو بیلٹ اینڈ روڈ فورم جہانی برادری ءِ پارینے کہ انسانیت نا اسیجائی آخبت اتون اسہ کمیونٹی نا تصور جہانی حالیت و لس بدل مروک رجحان تا بصیرت آ تالان انسانی راج انا شونداری کن اسہ فعال نقطہ نظراسے۔ اوپارے کہ بیلٹ اینڈ روڈ انیشی ایٹیو نااولیکو عشرہ ٹی چینی سرکڑدہ غاک اودے پدریسہ مون آ درینو، بی آرآئی اسہ مریس مدتی پلیٹ فارم اسے ہرا مدام غٹ ءِ شونہالی نا وارخواہی فراوان کرساکیک۔ محمد ضمیر اسدی پارے کہ سی پیک اٹ ہراڑے بنداوی پنجر نا شونداری ءِ اولیت تننگ اوار ءِ ہموڑے ہڑتوم آ ملک آتا نیام اٹ دودوربیدہ ئی سرجزآتے مون آ دننگ ہم اوار ءِ تانکہ السی ہن و بر تیٹی ودکی مننگ کے۔
