اسلام آباد۔ 31 اکتوبر (اے پی پی) نگران بنجائی وزیر حوالکاری و شینکاری مرتضیٰ سولنگی پارینے کہ گچین کاری تیٹی پی ٹی وی نا اہم ءُ کڑداسے، پی ٹی وی غٹ سیاسی جماعت آتے اسہ وڑ کوریج نا فراوانی بایدے اولیت مرے، ساف ، شفاف و بے کنڈہلوک گچین کاری تیکن پی ٹی وی نا کڑد ناقابل فراموش مریک۔ داہیت ءِ او سے شنبے نادے آ داڑے پی ٹی وی نیوز کرنٹ افیئرز و سوشل میڈیا ٹیم تون اوڑدہی ٹی گپ وتران کرسا پارے۔ اوڑدہی ٹی بنجائی سیکرٹری حوالکاری ظہور احمد و پی ٹی وی نا ڈائریکٹر کرنٹ افیئرز عون ئسک ہم ساڑی ئسر۔ نگران بنجائی وزیر حوالکاری ءِ پی ٹی وی نیوز و کرنٹ افیئرز پروگرام تا بابت حوال ہم تننگا ۔ داوخت آ گپ وتران کرسا نگران بنجائی وزیر حوالکاری پارے کہ پاکستان ٹیلی ویژن ملک اٹی میڈیا نا غٹ آن بھلا ادارہ ءِ و گچین کاری تیٹی پی ٹی وی نا قومی کڑد اہمیت تخک۔ اوپارے کہ پی ٹی وی آ غٹ سیاسی جماعت آتے اسہ وڑ کوریج نا بایدے فراوانی مرے، ساف، شفاف و بے کنڈ ہلوک گچین کاری تیکن پی ٹی وی نا کڑد ناقابل فراموش مریک۔ اوپارے کہ چندی سیاسی جماعت آتا راہشون آتا حالات حاضرہ نا پروگرام تیٹی بشخ ہلنگ آن پی ٹی وی نا اعتباریت اٹی ودکی مریک۔ داوخت آ پی ٹی وی ٹیم نگران بنجائی وزیر حوالکاری ءِ پارے کہ تدوک آ منہ سال تیٹی خبرآتا کوریج و سکوپ اٹی ترندی آن ودکی مسنے ، پی ٹی وی نا کنڈآن بلیٹن آتا کچ اٹی ودکی آن ناظرین آتے تازہ حالیت آتیان آگاہی ٹی کمک رسینگانے، خبرآتیٹی آن کیمرہ رپورٹنگ و راجی ویل آتا بابت رپورٹ آتے خصوصی اہمیت تننگ انگ ءِ، خبرآتا بشخ اٹی نئے بیرہ مقداری لحاظ اٹ بدلی بسنے بلکن نیشنل نیو ز بیورو اسلام آباد و ایلو سینٹر آتیان پیش کش نا انداز ہم بدل مسنے۔
