اسلام آباد۔ 31اکتوبر (اے پی پی) چیئرمین سینیٹ محمد صادق سنجرانی پارینے کہ پاکستان روانڈاتون تینا ہڑتوم آکنڈآتا تعلقداری تے بھاز اہمیت ایتک، ’’لک افریقہ‘‘ پالیسی نا ردات کمکاری نا پوسکن ءُ کسرملنگ، گچین رابطہ و واپاری کمکاری ٹی کمک رسینگک، پاکستان روانڈاٹی تینا سفارت خانہ اس جوڑ کرینے ہراڑان ہڑتوم آ ملک آتا تعلقداری ٹی نمان گچینی بسنے۔ سینیٹ سیکرٹریٹ آن جاری بیان نا رداٹ داخیال آتا درشانی ءِ او روانڈا سینیٹ نا صدر ڈاکٹر کالندافرانسواں زیویئر نا کماشی ٹی پارلیمانی ڈل اتون گپ وتران کرسا کرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی ہڑتوم آکنڈآتا تعلقداری، پارلیمانی رابطہ غاتے مون آ دننگ تون اوار تین پہ تینی است خواہی نا امور آ سرجمی اٹ گپ وتران کننگا۔ اوڑدہی ٹی سینیٹردلاورخان، نسیمہ احسان، ذیشان خانزادہ، فدامحمد، بہرمند خان تنگی و سیکرٹری سینیٹ محمد قاسم صمدخان ئسک ہم ساڑی ئسر۔ اوڑدہی ٹی ’’لک افریقہ‘‘ پالیسی نا رداٹ ہڑتوم آ کنڈآتا واپار ءِ پین ودفنگ آ ہم گپ وتران کننگا۔ اوڑدہی ٹی ہڑتوم آ کنڈآتا تعلقداری ءِ پین سوگو کننگ کن پارلیمانی رابطہ، سفارتکاری و ڈل آتا ہن و بر آ زور شاغنگا۔ داوخت آ چیئرمین سینیٹ محمد صادق سنجرانی پارے کہ پاکستان اٹی نمے خناٹ بھاز خوشی مس۔ پاکستان روانڈاتون تینا ہڑتوم آ کنڈآتا تعلقداری تے بھاز اہمیت ایتک۔ ہڑتوم آ ملک آتا نیام اٹ خوشگوار تعلقداری مون آ ہِننگ ءُ۔ افریقی ایلم تتون دوستانہ و گچین تعلقداری جوڑ کننگ نا خواہندار اُن۔ اوپارے کہ روانڈا زیبا وساف ستھرا ءُ ملک اسے۔ افریقی ملک آک اسہ ایلو نا جھیڑہ ءِ صبر وتحمل و اواری اٹ تینٹ ایسر کرینو۔ اینو پاکستان و روانڈا نا نیام اٹ سنگتی نا پوسکن ءُ بشخ اس ملنگ انگ ءِ۔ حکومت پاکستان و سینیٹ آف پاکستان ہروڑنا گچین تعلقداری، کمکاری و اواری اٹ کاریم کننگ کن تیار ءُ۔ چیئرمین سینیٹ پارے کہ کشت وکشار ، فوڈ سیکورٹی و انسانی وسیلہ غاتا شونداری ٹی کمکاری نا بھلو گمان اس ارے، ہرافتیان پبی فائدہ ہرفنگ مریک۔ ہڑتوم آ کنڈآتا واپار و زرکاری ءِ مون آدننگ کن ہڑتوم آ ملک آتا پوریاگر آتا تعلقداری تے پین مون آ دننگ نا گرج ءِ۔ فلسطین نا ویل مچ آ دنیا کن فریشانی نا سوب جوڑ مسنے۔ اقوام عالم ءِ فلسطین نا ویل انا ایسری کن گچین حکمت عملی اس اختیار کروئی مریک۔ اوکان پد روانڈا نا ڈل سینیٹ میوزیم نا دورہ ءِ کرے ہراڑے ڈل ءِ سینیٹ نا وڑوڈول آ سرجم حوال تننگا و ڈاکومنٹری اس ہم نشان تننگا۔ روانڈا نا سینیٹ نا صدر مہمان تا کتاب اٹی تینا تاثرآتے ہم نوشتہ کرے۔
