لاہور۔ 31 اکتوبر (اے پی پی) نگران وزیراعظم انوارالحق کاکڑ پارینے کہ نگران حکومت ملک انا زرگزرانی سوگوی و شونداری کن ہرممکن کوشست کننگ ءِ، اسہ قوم اس ہم تعلیم نا زیور آن بہرہ مند مننگ آن بیدس شونداری نا مز ل آتے طے کننگ کپک، تعلیم نا بشخ انا گچینی کن اواری اٹ کاریم کروئی مریک، ورناک ملک انا نہادی میرات ءُ، حکومت ملکی شونداری کن دے و نن کوشست کننگ ءِ، آئی ٹی نا بشخ ءِ مون آ درسا بھلو زرمبادلہ اس کٹیا کننگ مریک، سی پیک ڈٹ آن پاکستان شونداری نا مزل آتے طے کرینے، کشاری بشخ ملکی زرگزران اٹ تمبہ نا حیثیت تخک، دا بشخ اٹی پوسکن آ ٹیکنالوجی و ریسرچ ءِ تینا کرسا ملک ءِ خودکفیل کننگ مریک۔ داخیال آتا درشانی ءِ او سے شنبے نادے آ انسٹی ٹیوٹ فار آرٹ اینڈ کلچر نا اولیکو کانووکیشن آن بطور مہمان خاص تران اٹی کرے۔ نگران وزیراعظم پارے کہ دادود اٹی بشخ ہلنگ کنکن شرفمندی اسے۔ تعلیم اسہ ہندن ءُ سلہہ سے ہرادے کاریم اٹ اتسا ملک انا تقدیر ءِ بدل کننگ مریک۔ تعلیم نا دوئی کننگ آن نئے بیرہ انفرادی بلکن اجتماعی وڑاٹ معاشرتی بدلی اتنگ مریک۔ راج اٹ بریبری، انصاف نا مون آ دننگ و تعلیم نا بشخ انا گچینی کن غٹ ءِ اواری اٹ کاریم کروئی مریک۔ حکومت اسہ وڑ تعلیم نا فراوانی کن پبی گام گیج کننگ اٹی ءِ۔ اوپارے کہ پاکستانی طالب علم آک مچ آ دنیا ٹی تینا لائخی تے منفینو، و تینا ملک انا پن ءِ روشنا کرینو۔ اوڈگری ہلوک آ طالب علم آتے مبارکبادی ترسا پارے کہ ورناک پاکستان نا آخبت ءُ، تینا راج انا گچینی نا بابت اوفتیا بھلو زمواری اس بیٹ مریک۔ تعلیم یافتہ ورناتے خاص وڑاٹ دا راج انا محروم بندغ آتا خاص وڑاٹ خیال ءِ تخر و تینا لائخی تے اوفتا زند ءِ گچین کننگ کن کاریم اٹ اتیر۔ تعلیم یافتہ بندغ آتا منفرد زمواری ءِ کہ او راج انا گچینی ٹی تینا کڑد ءِ اداکیر۔ خوش بختی اٹ پاکستان اٹ ورناتا کچ ہم زیات ءِ۔ گرج دا ہیت انا ءِ کہ دا ورناتا لائخی تے کاریم اٹ اتنگ مرے۔ دا بابت استاد آتا کڑد بھاز اہم ءِ۔ ای انسٹی ٹیوٹ فار آرٹ اینڈ کلچر نا استاد آتے ہم مبارکبادی ایتیوہ ہرافک دا طالب علم آتا سرسہبی ٹی اہم ءُ کڑد اس ادا کریر۔ تعلیمی پڑاٹ آئی اے سی نا کڑد سفت ناقابل ءِ۔ کنے اومیت ءِ کہ ادارہ نا فارغ التحصیل طالب علم آک ملکی شونداری کن اہم ءُ کڑد اس اداکیرہ ۔ نگران وزیراعظم پارے کہ طالب علم آتے بڑزکو و فنی تعلیم آن بہرہ ورکرسا ملک انا تقدیر ءِ بدل کننگ مریک۔ تعلیم نا کمک اٹ نن تینا راج اٹ تحمل و افہام و تفہیم نا فضاودی کننگ کینہ و بریبری و انصاف کون آ اصول آتا پاسداری ءِ کننگ کینہ۔
