اسلام آباد۔ 30 اکتوبر (اے پی پی) چیئرمین سینیٹ محمد صادق سنجرانی نا سلہ غا جمہوریہ روانڈا نا سینیٹ نا صدر ڈاکٹر کالندا فرانکوئس زیویئر شش باسکی ڈل اتون اوار پنچ دے ئی دورہ غا دوشنبے نا سہب اتون اسلام آباد پاکستان آ سرمس۔ دوشنبے نادے آ سینیٹ سیکرٹریٹ آن جاری بیان نا رداٹ سینیٹر مہمانداری و چیئرمین سینیٹ قائمہ کمیٹی کامرس سینیٹر ذیشان خانزادہ روانڈانا پارلیمانی ڈل انا اسلام آباد بالی پٹ آ بخیرکرے۔ سینیٹر ذیشان خانزادہ روانڈانا ڈل ءِ اسلام آباد بالی پٹ آ بخیر اٹ پارسا گلدستہ اس پیش کرے۔ روانڈا نا پارلیمانی ڈل انا چیئرمین سینیٹ محمد صادق سنجرانی تون اوار بڑزکو کہول اوڑدہی گمانی ءِ۔ پنچ دے ئی دورہ ٹی روانڈا نا ڈ ل انا صدر پاکستان ڈاکٹر عارف علوی ، نگران وزیراعظم انوارالحق کاکڑ ، و ایلوفتے تون اہم اوڑدہی تا ہم گمانی ءِ۔ ڈاکٹر کالندا فرانکوئس زیویئر تینا پارلیمانی ڈل اتون اوار انٹرنیشنل پارلیمنٹرین کانگریس (آئی پی سی ) ، اسلام آباد چیمبرآف کامرس و ادارہ پارلیمانی خذمت آتا دورہ ءِ ہم کیک۔ اسلام آباد آ سرمننگ آ ڈاکٹرکالندا فرانکوئس زیویئر پارے کہ پاکستان نا دورہ ءِ کرسا خوشی محسوس مننگ ءِ۔ چیئرمین سینیٹ نااست انا حب اٹ منتوار اُٹ ہراپاکستان نا دورہ ءِ کننگ نا سلہ خلک۔
