اسلام آباد۔ 30 اکتوبر (اے پی پی) دفترخارجہ پارینے کہ پاکستان اٹ رہینگوک غیرکانودی درملکی تے کشنگ نا فیصلہ وتواجہ ملکی کانود و جہانی اصول آتا رداٹ ءِ۔ ترجمان ممتاز زہرہ بلوچ اقوام متحدہ نا ہائی کمشنر (یواین ایچ سی آر) نا اسہ بیان اسے نا ورندی ٹی پارے کہ دافیصلہ پاکستان نا وتواجہ ملکی کانود و قابل اطلاق جہانی قدر و اصول آتا رداٹ ءِ۔ یواین ایچ سی آر پاکستانی کمامدارآتیان خواست کریسس کہ یکم نومبر ناڈیڈلائن چٹنگ آن پد ملک بدری نا فیصلہ معطل کننگے۔ ترجمان پارے کہ نن اقوام متحدہ ناہائی کمشنر انسانی حق انا دفترنا پریس بیان ءِ خنانن۔ غیرکانودی رملکی تا وطن آ واپسی نا ڈٹ (آئی ایف آر پی ) اوفتا قومیت و اصل ملک آن قطع نظر،پاکستان اٹ غیرکانودی وڑاٹ رہینگوک غٹ درملکی تیا لاگومریک۔ ترجمان پارے کہ پاکستان اٹ کانودی وڑاٹ رہینگوک یا رجسٹرڈ غٹ درملکی شاری دا ڈٹ انا دنگ آن پیشن ءُ۔ حکومت پاکستان دا مخلوق نا رکھ و حفاظت نا گرج آتا بابت تینا قو ل آتے بے کچ سنجیدگی اٹ ہلیک۔ اوذکر کرے کہ لکھ آ اوغان ایلم و ایڑھ تا مہمانداری ٹی ملک انا تدوک آ 40 سال آتا ریکارڈ دانا شاہدی ءِ۔ ترجمان جہانی برادری آ زور شاغا کہ او اولیتی باندات نا وڑاٹ پائیدار ایسری نا چرجوئی ٹی مہاجر آتا ویل اتون مون تننگ کن اجتماعی کوشست آتے ترند کے۔ اوپارے کہ پاکستان دا مسخت کن تینا جہانی شریدار آتون اواری اٹ کاریم کرسا کیک۔
