اسلام آباد۔ 30 اکتوبر (اے پی پی) نگران وزیرداخلہ سرفراز بگٹی پارینے کہ دھرنا و برانز سردار اخترمینگل و اونا پارٹی نا حق ءِ ولے اونا انتظامیہ غان موکل نا ضرورت مریک، نن اوڑتون مذاکرات کینہ، و محدود مینڈیٹ اتون انتس کہ کننگ کرین کننگک، پارلیمان پورو مرے تو بے گوا بندغ آتا باندات آ بامسخت شرہ مرے۔ دوشنبے نادے آ سینیٹ اٹی سینیٹر میاں رضا ربانی نا اعتراضی ٹک آ گپ وتران کرسا نگران وزیرداخلہ پارے کہ بلوچستان نیشنل پارٹی (مینگل) تدوک آ پنچ سال اٹی حکومت آتا بشخ رہینگانے، آخیریکو دے تیٹی اودے بلوچستان نا حکومت اٹی ہم اوار مننگ نا موقع ملا، پارلیمان نا فورم اوڑتون ساڑی ئس، بی این پی (مینگل) ءِ اسلام آباد اٹی پریس کلب نا مون آ دھرنانا انتظامیہ موکل تسوسس ولے اونا جماعت ریڈزون اٹی بسنے و برانز کروک آتیٹی مسکوہی پارلیمنٹ نا باسک آک ہم اوار ءُ۔ بلوچستان اٹی بے گوا بندغ آتا ویل انا چندی سوب آک ءُ، پارلیمان پورو مننگ آن پد داویل آ ہندن ءُ کانود سازی اس کے ہرا شرپسندی ٹی اوار ءِ اونا برخلاف سیکورٹی فورس آک ہراوڑ کارروائی کننگ کیرہ۔ اوپارے کہ بلوچستان اٹی تو بی ایل اے، بی ایل ایف، لشکر بلوچستان شرپسندانہ سرجزآتیٹی اوار رہینگانو و اوفک لس شاری و سیکورٹی کارندہ غاتا برخلاف کارروائی کرینو۔ کوئٹہ ٹی ہرافک تدوک آ سد سال آن آباد ئسر، اوفتے مجبوراََ ہموکان ہمپوئی تمانے، استاد، ڈاکٹر و پنجاب آن تعلق تخوک آ بندغ آتے ہم شست کننگانے، اوفتا زموار آتا برخلاف سیکورٹی فورس آک آپریشن کرسا کیرہ، کانود نا رداٹ کس اسے ہم پرائیویٹ لشکرتخنگ نا موکل اف۔ اوپارےکہ دھرنا و برانز اخترمینگل و اوناپارٹی نا حق ءِ اودے نن چیلنج کپنہ ولے اوڑکن اول موکل ہلنگے، ریڈزون اٹی پین کس ءِ برانز نا موکل اف تو اودے ہم بایدے موکل تفننگوسس، ولے اوداسہ داڑے بسنے تو نن اوڑتون مذاکرات کینہ، اوناہیت ءِ بِننہ، محدود مینڈیٹ اتون انتس کہ کننگ کرین کینہ۔
