اسلام آباد۔ 30 اکتوبر (اے پی پی) پاکستان انٹرنیشنل ایئرلائن( پی آئی اے) نا زہمی آپریشن ایندھن نا فراوانی گچین مننگ آن بحالی نا کنڈآ ہِننگ ءِ، دوشنبے نادے آ چندی ملکی و جہانی جہاز آتے چلیفنگا۔ پی آئی اے نا ترجمان عبداللہ حفیظ خان نا کنڈآن دوشنبے نادے آ جاری بیان نا رداٹ 30 اکتوبر دوشنبے آ پی آئی اے 45 جہاز آتا شیڈول اس طے کرینے۔ پی آئی اے نا ملک اٹی آپریشن ہم بحال مننگ بناکرینے۔ ترجمان پارے کہ پی آئی اے دوشنبے آ کراچی، لاہور، اسلام آباد، گلگت و سکردو نا جہاز آتے چلیفک۔ ترجمان پارے کہ جہانی جہاز آتیٹی جدہ ، مدینہ، بحرین، دبئی، کوالالمپور پین پین نا جہاز آک ہم دوشنبے آ شیڈول نا رداٹ آپریٹ مریرہ۔ ترجمان پارے کہ بروک آ منہ دے اٹی ایندھن نا حالیت آتیٹی پین گچینی نا سوب آن آپریشن ہڑدے نا رداٹ بننگ گمانی ءِ۔
