اسلام آباد۔ 30 اکتوبر (اے پی پی) چیئرمین سینیٹ محمد صادق سنجرانی صوبہ بلوچستان اٹی آواران نا علاقہ کھوڑوٹی سیکورٹی فورس آتیا دہشت گرد آتا سم کاری نا ترندی اٹ مذمت ءِ کرینے۔ دوشنبے نادے آ سینیٹ سیکرٹریٹ آن جاری بیان نا رداٹ چیئرمین سینیٹ دہشت گرد آتا جلہو اٹی شہید مروک آ کارندہ غاتا خاہوت آتون دلی ہمدردی و ہڑزخواہی نا درشانی ءِ کرینے۔ اوٹھپی مروک آ سیکورٹی کارندہ غاتا زوت دراخ جوڑی کن دعاکرے۔ چیئرمین سینیٹ پارے کہ دہشت گرد آک شونداری نا عمل ءِ توننگ خوارہ ہراٹی او اسُل سرسہب مفسہ، دہشت گردی نا برخلاف جنگ اٹ پاکستان نا سیکورٹی فورس آک بے مٹ قربانی تسنو۔ اوپارے کہ ڈیہہ انا امن نا بقاء کن سیکورٹی فورس آتا قربانیک زیان مفسہ، پاکستان ڈیہہ اٹی امن کن دہشت گردی نا برخلاف مدام توار بڑزکرسا کیک۔ اونا پاننگ ئس کہ داوڑنا لغوری جلہو ملک اٹی امن وایمنی نا حالیت آتے لتاڑنگ کپک، سیکورٹی فورس آک دہشت گردی نا لعنت ءِ چٹفنگ کن سنبرینگوک ءُ۔
