چین و امریکہ نا تین پہ تینی تعلقداری ءِ سوگو کننگ کن مثبت کلہو، چین و امریکہ گپ وتران ءِ برجاتخنگ  ءِ جوان تکنہ، چینی وزیرخارجہ

بیجنگ۔ 29اکتوبر (اے پی پی) کمیونسٹ پارٹی آف چائنا نا مرکزی کمیٹی نا سیاسی بیورنا باسک و چین نا وزیرخارجہ وانگ وی واشنگٹن اٹی امریکی سٹریٹجک حلقہ آتون گپ وتران کرے۔ چینی ٹی وی سی جی ٹی این نا رداٹ وانگ ای پارے کہ اونا دورہ ءِ امریکہ ٹی چین و امریکہ بریبری و تین پہ تینی شرف نا رویہ غاتون اسیجائی گڑتی نا چندی باندات آتیا سخت، تعمیری و پبی سٹریٹجک گپ وتران کریر۔ و اسیجائی وڑاٹ چین امریکہ تعلقداری ءِ سوگو و گچین کننگ کن مثبت کلہو اس  تس۔ چین و امریکہ ہڑتوم آک تکرہ کہ ہڑتوم آ ملک آتا نیام اٹ گپ وتران ءِ برجاتخنگ فائدہ مند و المی ءِ۔ فریق آک امنا کریر کہ سان فرانسسکو سمٹ نا اڈتننگ کن اواری اٹ کوشست کننگے۔ امریکی سٹریٹجک حلقہ غاتا شخصیت آتا پاننگ ءِ کہ امریکہ چین تعلقداری ءِ سوگو کننگ فریق آتا فائدہ ٹی ءِ۔ امریکی اسٹریٹجک برادری’’امریکہ و چین نا رابطہ نا بے سہبی نا نظریہ ‘‘ غان متفق اف و داہیت انا مخ تفی ءِ کیک کہ ہڑتوم آ ملک آتا نیام اٹ غٹ بشخ آتیٹی گپ وتران ءِ دُوارہ بحال کننگے، اقتصادی، واپاری، سائنسی و تکنیکی کمکاری ءِ مون آ دننگے، مخلوق نا نیام اٹ ہن و بر ءِ آسان کننگے و گپ وتران نا کمک اٹ فہم ءِ ودفنگے و غلط گمانی و غلط اندازہ غاتیان پاناد کننگے۔ امریکی سٹریٹجک برادری نا دا مننگ ءِ کہ جغرافیائی سیاسی جھیڑہ و جہانی افراتفری نا مون آ، امریکہ و چین کن المی ءِ کہ او مواصلات ءِ سوگو کرسا اسیجائی وڑاٹ جہانی چیلنج آتون مون ایتر۔