صدر مملکت ڈاکٹر عارف علوی نا ترکیہ نا 100 می سال دے آ ترک الس  ءِ مبارکباد

اسلام آباد۔ 29 اکتوبر (اے پی پی) صدر مملکت ڈاکٹر عارف علوی جمہوریہ ترکیہ نا 100 می سال دے انا وخت آ پاکستانی الس و حکومت نا کنڈآن ترکیہ نا صدر و الس ءِ مبارکبادی تسنے۔ یک شنبے نادے آ تینا اسہ ویڈیو کلہو اسے ٹی اوپارے کہ ای صدر رجب طیب اردوان ءِ جمہوریہ ترکیہ نا 100 می سال دے آ است انا حب اٹ مبارکبادی ایتیوہ۔ اوپارے کہ 29 اکتوبر 1923 آ عظیم راہشون مصطفیٰ کمال اتاترک نا کرشماتی کماشی ٹی جمہوریہ ترکیہ جوڑ مسوسس۔ صدر مملکت پارے کہ پاکستان و ترکیہ نا تعلقداری بھاز متکن ءِ ، پاکستان و ترکیہ نا جوڑ مننگ آن مست ہم دا ڈیہہ انا مخلوق و ترک الس نا عظیم سنگتی ئس۔ اوداہیت ءِ مون آتخا کہ ہڑتوم آ ملک آتا گچین تعلقداری نا کساس داہیت آن ہم مریک کہ دا ڈیہہ آن روسی جنگ اٹ جنگ تننگ کن کمکی گڑاتتون اوار اوار افرادی قوت ءِ ہم گدریفنگاسس ہرانا ترکی مدام مثبت ورندی ءِ تسنے۔ صدر مملکت مستی پارے کہ رجب طیب اردوان نا کماشی ٹی ترکیہ زبردست پیش رفت کرینے و داڑتون اوار اوار ساڑی آ ترک کماش آک مسلم دنیا نا ویل آتا چٹفنگ اٹ ہم شاندار قیات نا درشانی ءِ کرینو۔