راجہ پرویز اشرف نا جمہوریہ ترکیہ نا 100  سال پورو مننگ آ ترکیہ نا الس و سرکڑدہ غاتے است انا حب اٹ مبارکباد

اسلام آباد۔ 29 اکتوبر (اے پی پی) اسپیکر قومی اسمبلی راجہ پرویز اشرف جمہوریہ ترکیہ نا 100 سال پورو مننگ آ ترکیہ نا الس و سرکڑدہ غاتے است انا حب اٹ مبارکبادی ترساپارینے کہ ایلم ملک ترکیہ نا سرکڑدہ و الس ءِ جمہوریہ ترکیہ نا 100 می سال دے آ مبارکبادی ایتیوہ۔ یک شنبےآ قومی اسمبلی سیکرٹریٹ میڈیا ونگ انا کنڈآن جاری بیان اٹی اوپارے کہ ترکیہ تدوک آ صدی ٹی شونداری و شونہالی نا مزل آتے ترندی اٹ طے کرینے، صدر رجب طیب اردوان نا باکمال کماشی ترکیہ ءِ پین سوگو  کننگ اٹ اہم کڑدادا کرینے۔ اسپیکر قومی اسمبلی مستی پارے کہ ترکیہ دنیا نا منظر نامہ غا تینا سوگو زرگزران و دوٹوک موقف نا سوب آن اہم اسلامی ملک اس تصور کننگک۔ اوپارے کہ پاکستان و ترکیہ یک جان و اِرااست آنبارءُ۔ پاکستان و ترکیہ نا نیام اٹ تاریخی دوستانہ تعلقداری ، تین پہ تینی شرف و پت آ تالان ءِ۔ ترکیہ و پاکستان علاقائی و جہانی فورم تیا مدام اسہ ایلو نا موقف نا تائید ءِ کرینو۔ اسپیکر قومی اسمبلی راجہ پرویز اشرف پارے کہ پاکستان  وترکیہ ، فلسطین و کشمیر نا بابت اسہ وڑنا موقف تخرہ۔ اوپارے کہ پاکستان تینا ایلم ملک ترکیہ نا مستی سرسہبی و کامرانی کن دعاگوءِ۔