اسلام آباد۔ 28 اکتوبر (اے پی پی) اسپیکر قومی اسمبلی راجہ پرویز اشرف اسرائیلی فورس آتا غزہ غا بری، بحری و فضائی جلہو آتا ترندی اٹ مذمت ءِ کرسا فلسطینی الس تون پورو یکجہتی نا درشانی ءِ کرے و پارے کہ غزہ ٹی خور اناکاختی و ہسپتال آتیٹی ایندھن نا بندش آن بھلو انسانی تنکی اس ودی مسنے، انسانی حق انا علمبردار جہانی تنظیم تیا زور شاغا کہ او غزہ ٹی انسانی زند آتے بچفنگ کن گام گیج کیر۔ ہفتہ نادے آ قومی اسمبلی سیکرٹریٹ آن جاری بیان نا رداٹ اسپیکر قومی اسمبلی پارے کہ اسرائیل نا جارحانہ جنگی گام گیج فلسطینی تا نسل کشی نا مترادف ءِ، غزہ ٹی پورو بلیک آؤٹ و مچ آ نن اسرائیل نا ترند بمباری ناقابل برداشت ءِ، اسرائیل غزہ ءِ قبرستان اس جوڑ کرینے۔ اوپارے کہ غزہ ٹی خور اناکاختی و ہسپتال آتیٹی ایندھن نا بندش آن سنگین انسانی تنکی اس ودی مسنے، اسرائیل پدریسہ جہانی کانود آتا خلاف ورزی و جنگی ڈوہ انا مرتکب مننگ ءِ۔ اوغزہ ٹی شہید مروک آ تا وارث آتون ہمدردی و یکجہتی نا درشانی ءِ کرے۔ اسپیکر قومی اسمبلی فلسطین اٹی اسرائیل فورس آتا بمباری آن شہید مروک آ بندغ آتا درجہ غاتا بڑزی و پدسلوک آ خاہوت آتے صبر وجمیل نا دعاکرے۔
