کراچی۔ 28 اکتوبر (اے پی پی) صدر مملکت ڈاکٹر عارف علوی پارینے کہ ساڑی آنگران بنجائی حکومت و چیف آف آرمی اسٹاف جنرل عاصم منیر ملکی زرگزران ءِ گچین کننگ کن اسیجائی ڈٹ آتا رداٹ پیشن نا زرکاری ءِ اتنگ نا کوشست کننگ ءُ، فیصلہ سازی ملک ءِ زرگزرانی سوگوی نا کنڈآ دننگ اٹ اہم کڑد ادا کرے۔ داخیال آتا درشانی ءِ او ہفتہ نادے آ داڑے ہندی ہوٹل اٹی 15 می رائس ایکسپورٹرز ایسوسی ایشن آف پاکستان (آرای اے پی ) نا دود آن تران کرسا کرے۔ دود اٹی گورنر سندھ محمد کامران خان ٹیسوری ئسک ہم ساڑی ئسر۔ صدر مملکت پارے کہ پوریاگربرادری پاکستان ءِ زرگزرانی وڑاٹ سوگو کننگ کیرہ، پاکستان تون بے پناہ لائخی ارے ہرافتیان فائدہ ہرفنگ مریک۔ اوآرای اے پی ءِ 300 ملین ڈالر نا برآمد آتیان 3 بلین ڈالر اسکان نا سفر آ مبارکبادی تس۔ صدر آرای اے پی نا باسک آتے مشورہ ترسا پارے کہ او جوائنٹ وینچرز نا کنڈآ بریر و برنج نا ویلیو ایڈڈ گڑاتیا چکار تخر۔ اوپارے کہ بریانی فیسٹیول اسہ جوان ءُ خیال اسے و دااسہ ویلیو ایڈیشن اسے۔ اوآرای اے پی ءِ ایوان صدرا ٹ میلہ اڈتننگ نا سلہ ہم خلک۔ عارف علوی پارے کہ برنج نا پٹ وپولی ادارہ غاتے جہانی مارکیٹ آن پین فائدہ ہرفنگ کن بایدے بحال کننگے۔ اوآرای اے پی نا خواست آ پارے کہ حکومت و آرای اے پی اسیجائی وڑاٹ مارکیٹ آ تالان ادارہ اس بایدے جوڑ کیر۔ صدر مملکت پارے کہ زالبول آتے واکدار کننگ و ملکی زرگزران اٹ تینا کڑد ءِ ادا کننگ کن کمپنی تیٹی ملازمت کننگے۔ اوپارے کہ ملک ءِ مون تروک چیلنج آتون مون تننگ کن ننے تینا چناتے تعلیم تروئی مریک۔
