اسلام آباد۔25اکتوبر (اے پی پی):ادارکی مزن وزیر انوار الحق کاکڑءَ گشتگ کہ چین ءِ بیلٹ اینڈ روڈ انیشی ایٹو سرجمیں خطہ ءِ دیمروئی ءُ وشھالی ءِ زمانت اِنت، دوئیں ملک آنی نیامءَ انوگیں من ء ُ گرآنی برکت ءَ چین پاکستان اقتصادی راہداری ءِ تہا نوکیں درے پچ بیت۔ مزن وزیر کارگس ءِ میڈیا ونگ ءَ چہ شنگ بوتگیں بیان ءِ ردءَ اے ھیالانی درشانی پاکستان ءَ چین ءِ سفیر جیانگ زی ڈونگ ءَ گوں گپء ُتران کنان ءَ کتگ کہ آیاں چارشمبے ءِ روچءَ یکے دومی ءَ گوں گندء ُ نندکتگ۔ مزن وزیر ءَ وتی انوگیں چین ءِ ترءُتاب ءِ موہ ءَ جوانیں وش اتک ء ُ جوانیں چنء ُ لانچ کنگءَ چینی صدر شی جن پنگ ء ُ چینی سروکانی شکرء ُ منت گپتگ۔ ادار کی مزن وزیرءَ گشتگ کہ چین ءِ انوگیں ترء ُ تاب ءِ تہا ہرچ ہما مفاہمتی یات گیری ء ُ منء ُ گرآنی سرءَ دستخط کنگ بوتگ اَنت آیانی سرءَ عمل درآمد کنگءِ ھاترءَ پاکستان گامگیج چست کنت۔آئی ءَ گشتگ کہ چین پاکستان اقتصادی راہداری ( سی پیک) ءِ بروردآں چہ دوئیں ملک آنی اُلس پائدگ چست کنگءَ اَنت۔ چینی سفیر ءَ مزن وزیر ءَ را پاکستان ءِ دیمروئی ء ُ معاشی محکمی ءِ تہا چین ءِ سرجمیں کمک ءِ اوست داتگ۔
