مدینہ منورہ۔ 28 ستمبر (اے پی پی) نگران وزیراعظم انوارالحق کاکڑ مسجد نبوی ﷺ آ ہنا ہراڑے او روضہ رسول ﷺ آ حاضری تس، ریاض الجنہ ٹی نفل خوانا و دعاخواہس۔ پنچ شنبے نادے آ وزیراعظم آفس نامیڈیا ونگ انا کنڈآن جاری بیان نا رداٹ نگران وزیراعظم مسجد نبوی ﷺ تون ملحقہ جہانی میلہ و سیرت نبوی ﷺ و اسلامی تہذیب تون تعلقدار عجائب گھر نا دورہ ءِ کرے۔ میوزیم نا بورڈآف ڈائریکٹر زنا سیکرٹری ڈاکٹر ناصر مسفیرالزہرانی اودے جم جوش اٹ بخیرکرے۔ وزیراعظم ءِ دورہ نا وخت آ تاریخی عجائب گھر نا بارواٹی جوان حوال تننگا ہراٹی نبی آخرالزمان ﷺنا زند و رغاموک آتون اوار اوار اسلامی تہذیب ءِ ہم تالان کننگانے۔ وزیراعظم میوزیم نا ستاءِ کرسا الامی میرات نا رکھ و اودے نمان کننگ کن کروک آ کوشست آتا ستاءِ کرے۔ ڈاکٹر ناصر مسفیر الزہرانی وزیراعظم ءِ شیلڈ وکتاب پیش کرے ہرا پاکستان و سعودی عرب نا نیام اٹ اسلامی میرات و تین پہ تینی افہام و تفہیم نا مون آ دننگ نا رشتہ نا نشانی ءِ۔ مدینہ منورہ ٹی جہانی میلہ و میوزیم پیغمبر اسلام خواجہ محمد ﷺ نا زند و اسلامی تہذیب نمان کننگ کن بھاز اہمیت تخک۔ دا میوزیم نمائش و ملٹی میڈیا پریزینٹیشن آتون اسہ عمیق آزموندہ اس پیش کیک و پیغمبر اسلام خواجہ محمد ﷺ نا بابت تاریخ، اہم واقعہ و تعلیمات آتے مون آتخک، دا میوزیم اٹی چندی بشخ آتیٹی اسلامی تہذیب نا سرسہبی تے ہم نشان تننگانے، میوزیم بین المذاہب مقالمہ، افہام و تفہیم ءِ مون آ دننگ و متنوع عقیدہ و خواست آتا شرف نا مون آ دننگ نا مرکز ءِ۔
