اسلام آباد۔ 28 ستمبر (اے پی پی) چیئرمین سینیٹ محمد صادق سنجرانی مبارکبادی ترسا پارینے کہ دادے ءِ اڈتننگ نا گچین وڑوڈول دادے کہ نن تینا کڑد و گفتار و اخلاق و عمل اٹ پک کین کہ نن خواجہ ﷺ نا امتی اُن۔ پنچ شنبے نادے آ عئید میلا دالنبی ﷺ نا بابرکت وخت آ تینا کلہو اٹی اومسلمانان عالم اسلام و خاص وڑاٹ اہل وطن ءِ است انا حب اٹ مبارکبادی پیش کرینے۔ چیئرمین سینیٹ دا پُرنور مقدس وخت آ اللہ تعالیٰ آن دعاکرے کہ دا بابرکت دے انا فضیلت و سعادت اٹ ہر مسلمان نا است ءِ نور آن منور کے و وطن عزیز ءِ دا مقدس دے انا نسبت اٹ تینا حمت آتیان مالامال و مون تروک ویل آتیان نجات ترفے۔ خاتم النبیین آنحضرت محمد ﷺ بیرہ مسلمان تیکن آخا بلکن بنی نوع انسا ن و غٹ کائنات کن رحمتہ اللعالمین مرسا بس۔ دارداٹ 12 ربیع الاول نا دے اسلامی تاریخ نا ہی آخا بلکن مچ آکائنات و انسانیت کن عظیم انگا دے انا درجہ تخک۔ دادے غٹ انسان تے نسلی، علاقائی طبقاتی، لسانی و جغرافیائی تعصب آتا مین آن کشسا واحدانیت، امن و مہرومریبت و سیوت و اسٹی نا درس ایتک۔ اخوت، ایلمی و بریبری نا فضاءِ قائم کننگ کن اسوہ حسنہ رسول ﷺ نا پیروی المی ءِ۔ ننا بقاء و دینی و دنیاوی سرسہبی نا سیبو اسوہ حسنہ نا پورو پیروی آ ٹی ءِ۔ اینو دا باسعادت دے ءِ اڈتننگ نا غٹ آن جوان انگا وڑوڈول دادے کہ نن تینا کڑد، گفتار ، اخلاق و عمل اٹ دا پک کین کہ نن رحمتہ اللعالمین نا امتی اُن و ہنین آ پیغمبر ﷺ نا رغاموک آتیا عمل کرسا تینے ٹی سیوت و سخا، مہرومریبت و رواداری و احساس کون آ نایاب اوصاف ودی کینہ ہراننا ملک وقوم انا شونداری و شونہالی کن کسر آتے آوار کننگ اٹ کمکار مرے۔ ای دا مقدس و بابرکت دے انا رداٹ غٹ شہید ، غازی و مجاہد آتے ہم خراج عقیدت پیش کننگ خواوہ ہرافک وطن عزیز و ننا رکھ و امن و ایمنی کن بے مٹ قربانی تسر۔ خواجہ محمد ﷺ نا زند بنی نوع انسان کن کسر نا ڈیواءِ و دنیا و آخرت نا سرسہبی نا ضمانت ہم ارے۔ ای خدائے بزرگ و برتر نا بارگاہ ٹی دعاکیوہ کہ او ننے تینا زند ءِ حضور پاک ﷺ نا رغاموک آتے مون آتخسا تیر کننگ نا توفیق عطاکے۔ (آمین) ڈپٹی چیئرمین سینیٹ مرزامحمد آفریدی ہم تینا کلہو اٹی قوم ءِ 12 ربیع الاول نا بابرکت و پرمسرت وخت آ است انا حب اٹ مبارکبادی تس و پارے کہ اسوہ حسنہ ننکن کسر نا ڈیوا ءِ نن تینا زند ءِ اسلامی رغاموک آتا رداٹ تیر کین تو دین و دنیا نا سرسہبی پک ءِ۔ نن تینا اخلاق، قدر و روایت آتے اسلامی رغاموک آتے مون آ تخسا شاغن تانکہ نن دنیا وآخرت اٹ سرسہب مننگ کین۔ خواجہ محمد ﷺ غٹ بنی نوع انسان کن رحمت اللعالمین مرسا بس۔
