اسلام آباد۔ 28 ستمبر (اے پی پی) ڈیجیٹل مردم شماری 2023 نا رداٹ قومی و صوبائی اسمبلی تا پوسکن آ حلقہ بندی تا اشاعت آن پد اوفتیا اعتراض و سلاہ تے جمع کرفنگ بناکرینے ہرا 26 اکتوبر اسکان برجاسلک ۔ الیکشن کمیشن نا شیڈول نا رداٹ اعتراض آتے سلاہ تیا الیکشن کمیشن نا کنڈآن فیصلہ 28 اکتوبرآن 26 نومبر اسکان کننگک ہراٹی فریق آتا موقف ءِ بِننگک۔ اعتراض یا سلاہ جمع کرفنگ کن لازم ءِ کہ دا اعتراض آتے جمع کرفوک آ بندغ تعلقدار حلقہ نا ووٹر مرے۔ دا اعتراض آتے سیکرٹری الیکشن کمیشن نا پن جمع کرفنگ مریک۔ دااعتراض آتون نقشہ جات نا 8 کاپی الیکشن کمیشن اٹ جمع کرفوئی مریک۔ تعلقدار ضلع نا نقشہ جات الیکشن کمیشن ان نہاد نا ادائیگی ءِ کرسا دوئی کننگ مریک۔ کوریئر، ڈاک یا فیکس نا کمک اٹ سلا ہ یا اعتراض آتیا سجفپننگک۔ دا اعتراض آتے گچین کاری کانود 2017 نا شق 12 نا رداٹ جمع کرفنگ مریک۔
