کوئٹہ۔ 28 ستمبر (اے پی پی) ڈپٹی کمشنر لورالائی سجاد اسلم بلوچ گورنمنٹ بوائز ڈگری کالج لورالائی نا سرپرائز دورہ ءِ کرے ، او کالج اٹی تروک آ تعلیمی عمل نا جاچ ءِ ہلک ۔ داوخت آ پرنسپل ڈگری کالج لورالائی محمد یوسف کالج نا بارواٹی پورو حوال تس و کالج نا ویل آتا بارواٹی معلومدار کرے۔ ڈپٹی کمشنر سجاد اسلم بلوچ ڈگری کالج نا چندی بشخ آتا دورہ ءِ کرے و کلاس آتیا ہنسا طالب علم آتیان چندی سوج آتے ہم اَرفے ، داوخت آ کالج نا پروفیسر آتیان تعلیمی حالیت آتا بابت آگاہی ہلک و پروفیسر و طالب علم آتون گپ وتران کرسا ڈپٹی کمشنر سجاد اسلم بلوچ پارے کہ تعلیم ہی ہمواسٹ انگا ذریعہ ءِ شونداری نا غٹ مزل آتے طے کننگ کن و داسرسہبی بیرہ استاد آتا سوب آن ہی دوئی کننگ مریک ہنداسوب آن نم تینا مرتبہ ءِ ہرسا چناتا تعلیم و تربیت آ خصوصی چکار کبو تانکہ ننا بروک آ چین اسہ تعلیم یافتہ ملک آتا قوم اتون گام پہ گام ملفسا ہننگ کے داڑکن المی ءِ کہ نئے بیرہ نم تینا حاضری ءِ پک کبو بلکن تینا قابلیت نا جوہر ءِ نشان ترسا تعلیم یافتہ راج انا جوڑ کننگ اٹ تینا مثبت کڑد ءِ ادا کبو۔ ڈپٹی کمشنر لورالائی سجاد اسلم بلوچ پارے کہ محکمہ ایجوکیشن تون منسلک آفیسر و استاد آتیا بھلو زمواری اس مریک کہ او نئے بیرہ تینا حاضری ءِ پک کیر بلکن ہرا استاد تینا زمواری ءِ سرتننگ اٹ غیرحاضر مس اونا نئے بیرہ تنخواہ ءِ کاٹ کننگے بلکن اونا برخلاف محکمانہ کارروائی کننگے ، اوپارے کہ استاد آتے مرے کہ او تعلیم یافتہ راج انا جوڑ کننگ اٹ تینا مثبت کڑد ءِ ادا کیر تعلیمی سسٹم نا گچینی کن گام گیج آتے پک کیر تانکہ نن تینا صوبہ غان تعلیمی پسماندگی ءِ چٹفنگ اٹ سرسہب مننگ کین و تینا بروک آ پوسکن آ چین کن گچین وڑاٹ تعلیمی آب دُوبرے۔
