بجلی دُزی و بل آتا عدم ادائیگی نا سوب ملک ءِ سالانہ ارب آ روپئی نا نسخان مریک، ہرانا سوب آن الس ءِ زیات ریٹ آ بجلی ہلوئی تمک، ڈپٹی کمشنر ہرنائی محمد جاوید ڈومکی

کوئٹہ۔ 28 ستمبر (اے پی پی)ڈپٹی کمشنر ہرنائی محمد جاوید ڈومکی نا کماشی ٹی ڈسٹرکٹ انفورسمنٹ کمیٹی نا بجلی دُزی کروک  آ و بل تفروک آتا برخلاف بھلو کچ اسے آ کریک ڈاؤن نا بابت ارٹ میکو اہم دیوان اس اڈتننگا۔ دیوان اٹی سپرنٹنڈنٹ آف پولیس عبدالخلیل بگٹی، ایس ڈی او واپڈا افتخار خٹک، اسسٹنٹ کمشنر فہد شبیر چیمہ و ایلوفک بشخ ہلکر۔ داوخت آ بجلی نا غیرکانودی کنکشن خلنگ، بجلی نا بل تفروک آ نادہندگان و بجلی دُزی کروک آتا برخلاف آپریشن نا بابت داتم اسکان کروک آ کارروائی نا جاچ ءِ ہلنگا۔ ڈسٹرکٹ انفورسمنٹ کمیٹی نا چیئرمین ڈپٹی کمشنر ہرنائی محمد جاوید ڈومکی دیوان آن تران کرسا پارے کہ مچ آ ملک آنبار الیکٹرسٹی تھیفٹ کنٹرول ایکٹ نا رداٹ بجلی نا بل اداکپننگ و بجلی دُزی کروک آتا برخلاف ہرا کارروائی مسنے اوفتے مون آ ہم پین ترند کروئی مریک۔ اوپارے کہ بجلی دُزی و بل آتا عدم ادائیگی نا سوب ملک ءِ سالانہ ارب آ روپئی نا نسخان مریک، ہرانا سوب آن الس ءِ زیات ریٹ آ بجلی ہلوئی تمک ہراتم اسکان بجلی دُزی نا چرجوئی چٹپک و بجلی صارف آتا کنڈآن بل ادا کننگپک ہموتم اسکان نہاد آک شیف بفسہ۔ ڈپٹی کمشنر محمد جاوید ڈومکی پارے کہ الس و بجلی نادہندگان آتے مرے کہ بل انا ادائیگی ءِ تینا قومی فرض تکسا پک کیر تانکہ بجلی نا دا تنکی آن قومی کہول آ سرسہبی آن ہمکنار مننگ کیر۔