اسلام آباد۔ 27 ستمبر(اے پی پی) صدر مملکت ڈاکٹر عارف علوی پارینے کہ پاکستان دنیا نا منہ است چکوک آ سیل وسواتی ہند آتا حامل ملک اسے، پاکستان بڑزانگا مشی آ ٹُل، کرکی پٹی، زیباغا جھیل، سرسوز وشاداب دامان، متکن آ تہذیب و پبی دودوربیدہ ئی میرات نا گل زمین ءِ۔ ایوان صدر نا پریس ونگ انا رداٹ صدر مملکت چارشنبے نادے آ سیل و سوات نا جہانی دے انا وخت آ تینا کلہو اٹی پارے کہ کنکن دا خوشی نا سوب ءِ کہ اینو نن جہانی یوم سیاحت 2023 ءِ اڈتننگ اُن، اینو نن ڈیہہ انا شونداری و شونہالی ٹی سیل و سوات نا بشخ انا کڑد و لائخی تے کاریم اٹ اتنگ نا عزم انا درشانی ءِ کینہ۔ اوپارے کہ ہرسال 27 ستمبر آ اقوام متحدہ نا جہانی تنظیم سیل و سوات(یواین ڈبلیو ٹی او) نا کنڈآن جہانی یوم سیاحت اڈتننگک۔ دادے ءِ اڈتننگ نا مسخت شعبہ سیاحت نا اہمیت و ننا راج آ اونا اثرآتا بارواٹی شعور تالان کننگ ءِ۔ صدر مملکت پارے کہ دا سال نا سیل وسوات نا دے انا سرحال ’’ سیل و سوات و چاگڑد دوست زرکاری’’ ءِ و دانا مسخت سیل و سوات ءِ مون آ دننگ و پائیدار شونداری کن چاگڑد دوست زرکاری نا گمان تا پیدواری ءِ کننگ ءِ۔ صدر ڈاکٹر عارف علوی پارے کہ اقوام متحدہ نا جہانی تنظیم سیل و سوات جہانی سیل و سوات نادے انا وخت ءِ کہ نن اقتصادی شونداری و پیدواری لائخی تے ودفنگ کن روایتی زرکاری آن بیدس پوسکن و غیرروایتی ایسرءِ ہم تینا کین۔ صدر مملکت پارے کہ اینو موسمیاتی بدلی تا سوب آن ودی مروک آ ہلہلہ ئی حالیت آتا سوب آن کیہی سیل و سواتی ہند و سیل و سوات آ سیبو کروک آآبادی و زرگزران تے بقانا بابت خطرہ مون تروک ءِ، موسمیاتی بدلی تیان بھاز زہمی بھاز انگا پدتموک ایلو ملک آتے زرکاری نا کمتی و کبینی نا تنکی نا ہم مون تروک ءِ، سیل و سوات نا پائیدار مون آ دننگ و رکھ آخبت کن ننے پوسکن آ دنگ و مریس مدتی ڈٹ بندی نا سخت گرج ءِ۔
