اسلام آباد۔ 27 ستمبر (اے پی پی) صدر مملکت ڈاکٹر عارف علوی بنگلہ دیش تون زرگزران ، دودوربیدہ وواپار نا بشخ آتیٹی کمکاری نا ودفنگ نا گرج آ زور شاغساپارینے کہ ہڑتوم آ ملک آتا نیام اٹ واپار ءِ ودفنگ نا بھلو گمان اس ساڑی ءِ۔ ایوان صدر نا پریس ونگ انا رداٹ صدر مملکت داخیال آتا درشانی ءِ بنگلہ دیش اٹی پاکستان نا پندار ہائی کمشنر سید احمد معروف تون گپ وتران کرسا کرے ہراچارشنبے نادے آ اوڑتون داڑے ایوان صدر اٹی اوڑدہی کرے۔ صدر مملکت پارے کہ بنگلہ دیش اٹی پندار ہائی کمشنر ہڑتوم آ ایلم ملک آتے پین خڑک اتنگ کن کاریم کے۔ صدر پارے کہ زرگزران، دودوربیدہ و واپار نا بشخ آتیٹی بنگلہ دیش تون کمکاری ءِ ودفنگ نا گرج ءِ، ہڑتوم آملک آک اسیجائی مذہب و تاریخ اس تخرہ۔ ہڑتوم آملک آتا نیام اٹ السی و دودوربیدہ ئی رابطہ غاتے ودفنگ نا گرج ءِ۔ صدر مملکت سید احمد معروف ءِ بنگلہ دیش اٹی بطور پاکستانی ہائی کمشنر تعیناتی آ مبارکبادی تس۔ صدر ڈاکٹر عارف علوی پندار ہائی کمشنر کن تینا فرض انا سرتننگ اٹ نیک است خواہی نا درشانی ءِ کرے۔
